成日都標榜破壞「死物」等同冇犯錯、甚至企圖帶出呢啲有「善良」意味嘅泛暴派，一遇到自己嘅「死物」被破壞，就即刻冇咁「雲淡風輕」嘞。元朗區議會泛暴派區議員方浩軒前日就喺facebook投訴自己議辦被破壞，更借機抹黑警察，未有報警就聲稱「報警都無咩意思」(圖)。而佢走法律罅搞嘅所謂「連儂牆」亦都被拆走，於是就又係暗示、又係扮無辜，「不遺餘力」分化市民關係，唯恐天下不亂。
方浩軒抹黑警 話「報警無意思」
一邊煽動暴徒搞破壞，一邊又跑去港鐵投訴維修慢嘅方浩軒，日前再次傾情演繹「雙重標準」。此前一直聲稱「死物唔重要」嘅�喺facebook發帖話「辦事處都仲未正式啟用，門口信箱就被偷走，文宣被破壞」，更趁機抹黑警察話「報警都無咩意思」，聲稱要「盡快係（喺）辦事處裝閉路電視」，更恬不知恥叫「搞事嘅人可以自重」。
走法律罅搞所謂「連儂牆」被拆
其實佢仲需要自重啦。身為一名區議員，唔單只唔幫助警察執法，仲喺有人因非法張貼「連儂牆」被捕後，將自己嘅宣傳橫額變成兩塊所謂「十八鄉中連儂牆」，為違法者撐腰。佢喺facebook話呢兩塊所謂「連儂牆」「memo紙同文宣都比人搣走」及「俾人拆咗」。
佢聲稱「雖然製作連儂牆banner時，我都有心理準備會俾人破壞」，但就扮無辜：「但我相信街坊可以用理性嘅方法表達意見」，最後又假惺惺「大家貼嘢嘅時候都要小心」，唔通係暗示貼嘢有機會被唔理性嘅市民「私了」？真係咁擔心街坊安全，唔好搞呢哋（啲）走法律罅嘅嘢唔係仲好咩？
■香港文匯報記者 文根茂