■「議會監察」踢爆何惠彬未有自我隔離7天。 fb圖片泛暴派啲區議員真係好唔可靠㗎，明明講話「錯就要認」、「不可逃避」，結果出完道歉post轉頭又刪返當冇事，講緊嘅就係元朗區議員何惠彬。何惠彬前晚喺facebook度出post，為披露區內確診者嘅具體地址道歉，仲話自己輕率、冒犯。不過，噚日再上佢fb個post已經唔見咗，乜今時今日公開道歉係咁隨意㗎咩？
何惠彬噚晚深夜出post，為自己披露確診街坊地址道歉，聲稱「喺未顧及確診者同親友感受、私隱之下，做出呢個行為，亦有違我過去三日一直對其他街坊堅持『唔好探問確診者具體地址』嘅講法。呢次我輕率、冒犯，於人於己，都係大錯。」佢仲話，已經刪咗相關嘅fb post，已請求部分親友轉告道歉，兼聲稱希望之後可以當面道歉??。佢以黑底白字寫到「謹此向確診者道歉」，仲加埋「錯就要認」、「不可逃避」嘅標籤。點知噚日再上佢fb，個道歉post已經冇咗，乜佢道歉與唔道歉之間都可以彈出彈入㗎咩？又話要當面道歉嘅？網上道歉都冇埋喎。
再睇下網上殘存痕跡，何惠彬並唔係佢所講嘅「堅持唔好探問確診者具體地址」囉，事關佢星期一先喺fb群組「天水圍國」度出post，內容講到管理處為耀富樓21樓重點消毒，佢仲揚言︰「預計今日（周一）內會收到正式通報『確診者具體地址』，一收到就會公佈邊層。」真係幾咁「保護」中招嘅街坊呢。
自我隔離7天又走數
有人或者會認為，何惠彬都係為其他街坊着想，提醒佢哋啫，但事實上何惠彬嘅行為就非常唔理街坊死活。「議會監察」日前就貼相踢爆︰「曾與麥業成開會嘅元朗區議員何惠彬，喺麥業成兒子確診當日承諾自我隔離7天，但不出大家所料，佢又走數啦。何惠彬連日嚟去勻見街坊、示威聚集，如果佢已經中咗招就真係大件事啦。」真係為街坊着想，不如先提防自己播毒啦。
■香港文匯報記者 甘瑜