唔通真係「黃」就大晒咩？黃店「基隆茶餐廳」喺深水埗北河街「恒貞大押」個位度開分店，但就無視地區文化歷史，將呢個處於戰前唐樓嘅舖位油到黃一黃，核突嚇人兼破壞地區特色，有「黃絲」竟然仲心心眼話︰「好黃呀！」有網民就批評︰「面目全非，咁唔係活化，係破壞緊歷史。」
二戰前嘅唐樓一向係香港特色建築之一，騎樓支柱更反映舊香港面貌，但嗰班成日都話要「光復香港」嘅「黃絲」，獲得歷史建築舖位係點做？就係二話不說油黃佢。近日，有網民喺facebook貼出黃店「基隆茶餐廳」喺深水埗北河街「恒貞大押」個位度開分店嘅相，餐廳將間舖頭招牌位置油成鮮黃色，連同喺騎樓嘅「恒貞大押」4字都被油黃油，真係慘不忍睹。
不過，班「黃絲」就相當興奮，「Kai Pong Lee」話︰「很黃很暴力，我鍾意。」
有網民就貼出舊相，以往裝修好有特色，「恒貞大押」個招牌亦非常具歷史感，「Pauline Lee」坦言︰「我反而覺得嘥左（咗）。」「Erica Leung」亦批評︰「面目全非，咁唔係活化，係破壞緊歷史。」
呢啲言論好快引起「黃衛兵」圍剿，有人鬧佢哋點解政府拆喜帖街佢哋唔出聲，直接將不同意見嘅人當做「藍絲」。「Aki Lo」忍唔住留言反駁︰「如果連同路人一句批評都接受唔到，我真係唔知你想『光復』一個點樣既（嘅）香港。你其實係推走緊同路人，不過或者你根本唔係想團結，只係想圍爐吧。是但啦。」
商業電台節目主持人健吾亦揶揄︰「好肉酸？唔係呀，『黃』就得啦。黃店做咩都啱㗎！」唔少人都喺健吾個post鬧間黃店嘅裝修肉酸，「Chun Kit Wong」亦慨嘆︰「殺人放火『黃絲帶』，遲d（啲）都無問題。」其實都唔使遲啲，修例風波時班黑衣暴徒又縱火、又燒人，「黃絲」都當冇嘢㗎。
■香港文匯報記者 甘瑜