「台獨」勢力成日話要支援香港嘅攬炒分子，點知聽到全國人大審議港區國安法，靠鼓吹香港「抗爭」先可以連任嘅台灣地區領導人蔡英文，日前就驚到喺facebook發聲明，稱如果港區國安法實施，香港民主自由同司法獨立嘅核心價值會受到「嚴重侵蝕」，台灣喺必要時會運用「香港澳門關係條例」第六十條，即停用呢條所謂促進港澳台往來嘅「條例」。換言之，即係過橋抽板，要同喺香港嘅「手足」割席囉，唔知班「港獨手足」又有咩感受呢？
若「條例」停用 人員來往中斷
被傳係「青症（青年新政）」軍師、身在台灣嘅林浩基對蔡英文割席感到「非常憂慮」，話「條例」一旦停止適用，唔止港人無辦法再移居台灣，連留學名額都會併埋入內地生類別。由於港人無任何辦法申請台灣「兩岸條例」入面嘅文件，所以蔡英文嘅講法等同中斷香港同台灣「一切人員」嘅往來，而流亡台灣嘅「義士」同在台工作、留學者，都無法延期簽註。
fb專頁「逐柯攻城師」亦鬧爆蔡英文大啖人血饅頭，因為蔡喺競選連任嗰陣時不斷聲稱「今日香港，明日台灣」，每日散播恐懼同仇恨，估唔到佢踩住「香港人嘅鮮血」連任後就即時割席。
該專頁其後再發帖話，去年香港爆發大規模「抗爭」，台灣電視台疲勞轟炸、一片義憤填膺，𠵱家蔡英文講完嘢，所有台灣撐港人嘅新聞都係兩句帶過。以前社會大講「今日香港，明日台灣」、「台灣撐香港」，𠵱家竟變咗「香港自找的」、「那人家內政，關台灣什麼事？」搞到出post嘅人都忍唔住問「會不會太噁心啊？」
林浩基：綠營憎港人入骨
網民「灰若」就留言解答：「都唔系（係）咁多台灣人真系（係）歡迎香港人，覺得佢地（哋）炒貴啲樓」林浩基睇完就點出事實：「其實唔關事啦，綠營本身就憎香港人入骨，畢竟佢地（哋）好妒忌我地（哋）有外國護照，所以點解我一直都睇唔起『台獨』，攪（搞）獨立運動既（嘅）目標係要做人地（美國）屬土，奴性重成咁。」
陸委會急改口 稱非「放棄香港」
可能因為蔡英文政績乏善可陳，加上民進黨前年地方選舉輸到慘不忍睹，所以台灣陸委會噚日急急改口，希望挽回「港獨」分子嘅支持，因此「澄清」蔡英文唔係要「放棄香港」，而係對「『北京』示警」，因為通過港區國安法嘅後果「極其嚴重」，希望「北京」勿「一意孤行」台灣嚟緊會更「積極協助」港人喎。
不過，突然被「台獨」分子「背叛」嘅網民似乎唔係好收貨，「李秀芬」就話：「票就騙到手了 ，誰管你甚（什）麼香港反送終（中）？」「Pomin Chung」就揶揄：「雙標黨啊，啊！外加帶風向黨」「Ciao Belladonna」就質問：「4月香港警察拘捕壹傳媒集團創辦人黎智英、民主黨創黨主席李柱銘、工黨副主席李卓人等15人，點解台灣方面毫無反應？呢（𠵱）家你就咁大反應？改完又改？」 ■香港文匯報記者 鄭治祖