個個都話自已「抗爭者」，唔通個個都有抗爭咩。話說 「中箭（香港眾志）」常委羅三七（羅冠聰）參加「初選」嘅職業一欄填咗「抗爭者」，有網民就同佢計數，問舊年去咗美國留學嘅囧s竟「抗爭」咗啲乜，仲話佢如果唔係因為美國爆新冠肺炎爆到不可收拾都唔會提早返，仲恥笑佢自認係「職業抗爭者」，係咪即係爆自己「抗爭」係有錢收嘅︰「究竟收咗幾多錢搞抗爭？」
羅三七喺名單嘅職業一欄填咗「抗爭者」，令一班「黃絲」都好嬲嬲豬，認為佢哋嘅「付出」原本係「無價」，但就俾羅三七攞咗嚟消費。
人哋「抗爭」佢去留學
facebook專頁「政治大嬸判」就出post同羅三七計數，話舊年香港人「抗爭」時，羅三七就急急腳逃難仆去美國讀書，到今年3月美國爆肺炎嗰陣，佢就書都唔讀仆返嚟香港避難，「你仲好意思話自己係『抗爭者』？！抗咗啲乜？！」
該專頁仲噴羅三七︰「香港人從來係為咗理念而『抗爭』，一個崩都無收過......點知原來你係職業『抗爭』者！究竟收咗幾多錢搞『抗爭』？你對唔對得住一班將自己『無私奉獻』畀呢場運動嘅香港人？！」完文後標籤「有事即鬆羅冠聰」。
「熱血公民」副主席鄭錦滿亦諷刺羅三七，話佢將「海外留學交流」講成「國際戰線」都算，但將「抗爭者」講成係一種職業，「咁我希望人人都失業。事實上，根本就唔應該有呢個『行業』。」
被譏晉升階梯係做議員
「Kai Hang Lam」話羅三七職業係「抗爭者」，其實係「暑期工」；「Le Klein Yeung」亦問如果「抗爭者」係職業︰「有冇得升職？」呢個，做到立法會議員咪升職囉，又真係有晉升階梯喎。
其實搞笑嘅並唔止羅冠聰，成日黐埋「中箭」度嘅「大專學界國際事務代表團」前發言人張崑陽聲稱自己嘅政治聯繫係「無」；而社民連「長毛」梁國雄則喺職業欄上填「被禠奪議員資格的立法會議員」，大晒社運CV。
件事搞笑成咁，網民都紛紛留言恥笑。「是咁的法網肥人」揶揄︰「假設我參選，我一定會係（喺）職業個一欄填上Professional ×upper（專業×噏師），好嗎？」■香港文匯報記者 郭家好
