■多區便利店《蘋果日報》堆積如山。網上圖片肥佬黎早兩日被拉，佢旗下份《蘋果日報》即刻借題發揮斂財，自吹會「熱賣」，喺肥佬黎被拉翌日就印咗55萬份報紙，唔少「黃絲」KOL更熱情推銷，點知全港滯銷。可能《蘋果》都知印得多都係「賣一份蝕一份」，所以日前立刻減少至13萬份，但仍然賣唔晒，到噚日減到7萬份都仲係一街都係。睇嚟，所謂「全民撐《蘋果》」之風都係一眾黃絲「自high」假象，《蘋果》最新印數係7.1萬份，同282（壹傳媒）嘅股價一樣，話咁快又重回低谷喇。
多區便利店堆貨
肥佬黎被拉翌日嘅《蘋果》「賣斷市」，其實都係幻覺嚟嘅啫。有街坊早就爆料，早兩日嘅所謂55萬份報紙，其實都係有人買嚟免費派，加印嘅《蘋果》實情日日滯銷。攬炒派KOL「Acr Varok Footman」噚日亦話，本想去便利店買《蘋果》，點知睇到剩咗成疊，仲貼埋相爆料。
離島區議員王進洋日前凌晨喺fb發帖，貼咗東涌區內所有7-Eleven便利店嘅地址，聲言只要下晝四點前全部《蘋果》被買斷，佢就剃光頭，仲話自己最憎光頭，如果唔找數，「2023年區議會選舉，我自行退出。」但係個「挑戰」根本毫無懸念，網友「Lau Wong」一早就評論話：「你一定唔會光頭，逸東仲有大把。」「Kcc Cc Kam」亦補充：「仲有好多，兩大棟（戙）。」
結果，當然係以失敗告終。「挑戰」失敗後，王進洋只得自己打圓場話：「蘋果日報，未必係你心頭好」，但「白色恐怖嘅蔓延從未停過」，要大家「由下而上改變呢份報紙」喎。
攬炒派促銷不果
元朗區議員張秀賢亦發帖呼籲街坊買《蘋果》，話便利店仲有好多，未買快啲買啦，但當然最終都係剩返一大疊。
其實《蘋果》已經嚴重滯銷，但居然仲有網友「呼籲」要幫手清理《蘋果》創刊25周年嘅特刊「蟹貨」，搞到處處見「果」蹤，真係情何以堪。■香港文匯報記者 杜思文