■阿Sa不惜拗腰為Kenny影靚相。香港文匯報訊（記者 李思穎）關智斌（Kenny）近日剛推出寫真集《尋蝶戀花》，新廣東歌《乾爹》MV亦於本月初正式上架，身形弗爆的他不忘騷肌向粉絲派福利，日前Kenny在社交平台放了三張溫文爾雅的新相，旋即引來不少藝人和粉絲的「心心眼」，紛紛留言大讚他靚仔兼有型，原來這輯作品是由好友蔡卓妍（阿Sa）操刀，阿Sa不惜拗腰為Kenny搵出好角度，又以「點影都靚」來形容Kenny，最後Kenny用「人間尤物」來介紹這位攝影大師，互笠高帽！
Kenny一身簡約打扮，白襯衫配西褲倚傍在牆上，不經意露出情深款款Chok到爆的眼神，已經成功吸睛，引來不少網友讚美，連另一男神周柏豪都忍不住讚「好靚仔」，張繼聰就搞笑說：「好靚仔，點解唔畀條路我哋行下？」，Kenny回說：「但係我冇你咁堅~壯~喎」張繼聰即回覆：「又靚仔又識氹人，玩晒！」
網民誇阿Sa十項全能
正當Kenny未有開估是由誰人操刀拍攝之際，阿Sa留言：「啲相咁熟面口嘅？係咪一個靚女幫你影㗎？」Kenny回話：「靚女到你唔信 #人間尤物」。其後阿Sa在個人社交平台貼出幫Kenny拍照的花絮相，留言：「上聯：幫關斌影相，下聯：點影都靚」Kenny才醒覺補鑊：「Hahahaha，唔記得介紹返個攝影師添 #正菜妍 btw，下聯係：一定唔會leung（娘）」
相中所見，阿Sa認真地拗晒腰幫kenny影相，絕對稱職，有網友指阿Sa這個帖文本身已經是一張超美靚相，也有網民說「點夠你玩，又影相又剪髮又煮嘢食，十項全能。」