■「夠薑媒體」喺網上預售背面印上「豬嘴黑衣人」嘅麻將。不過劣評如潮。 「夠薑媒體」fb截圖一邊嗌「碰！」「槓！」「食糊！」一邊支持「抗爭」嘅場面係咪好難想像呢？不過，「黃絲」為咗搵銀，幾難想像嘅嘢都可以做得出。一間專賣黑暴文宣產品嘅「夠薑媒體」，近日就喺網上預售一副背面印上「豬嘴黑衣人」嘅麻將。唔少「自己友」都頂唔順，狠批佢哋食人血饅頭，有人質問佢哋「打手足」係咩意思，有人更揶揄幾時出埋同一主題嘅避孕套喎。
「夠薑媒體」同兩個本土設計師「練黑龍」及「arkisan.hk」推出預售價1,288蚊一副「香港製造」嘅麻將，每隻麻將都係全黑色，背面印上「豬嘴黑衣人」嘅頭像。喺帖度，佢哋仲加咗一大堆標註，包括「不忘記」、「良心經濟圈」、「煲底見」等「黃絲」用語，引人落疊。
雖然有「黃絲」大讚副麻將好靚，不過，有唔少「黃絲」就對呢種產品好反感嘞。「死亡KOL」的陳偉霖就發帖揶揄：「呢啲算唔算係手足臨死前所講嘅『代我走埋落去』？」佢標註埋「唔爭在出埋大富翁」、「幾時出埋殯」。
「獨人」嘲「幾時出埋飛機杯」
「獨人」梁金成亦喺帖度揶揄，「好有趣呀，咁都畀你諗到！下次會唔會有排（牌）九呀∼輪盤呀∼大細呀∼咁呢？你哋咪on ×當有趣啦！不如整埋飛機杯同自慰器𠻹啦！」
親「熱狗」嘅「手作達人」吳斯翹就話：「消費義士的極致。今晚約齊腳打手足。」「水晶姥姥」李婉文亦加把口：「打義士，target藍屍（絲）market（目標係藍絲市場）？」
為咗盡量搲到「黃絲」支持，其實設計師已經將「三萬」、「一筒」、「西」變成白色，似係想咒「三萬警察一同歸西」，身為「熱狗」嘅「阿柱」就問︰「呢副係手足麻將喎，萬一你冇三萬，只湊到一同歸西，好意頭咩？」有網民就問萬一第時警察請多咗人去到四萬人點算，「阿柱」揶揄︰「 詐糊！」
唔少「黃絲」都猛畀劣評，「Bill Tsang」話：「哇，套死人麻將又整得幾鬼屎靚，再張套麻將命名為『手足』。一邊食住人血饅頭，一邊打手足，人生一大樂事，唔打手足就唔係黃絲，你今日打左（咗）未。」
「Will Lo」亦話：「好正呀！點樣既（嘅）抗爭最後都變左（咗）生財工具，人血饅頭！」「匡進」就話：「正呀！幾時會出condom（避孕套）呀，好期待！」 ■香港文匯報記者 陳川