■饅頭張出post做公關騷。 「龍門冰室/瓏門冰室」fb截圖「黃色經濟圈」嘅爾虞我詐真係好睇過宮鬥劇。「人血龍門（龍門冰室）」個老細饅頭張（張俊傑）之前要告暴動「手足」誹謗，搞咗場公關災難。事隔多日，饅頭張日前出post堅持話要告「手足」誹謗，但只需要佢賠一蚊，又話如果對方需要，可幫佢孭單暴動官司嘅錢喎。班龍粉以為佢「深明大義」眼濕濕，不過有心水清嘅「黃絲」就話，饅頭張本身就收咗香港人好多捐款，叫佢唔好以為做公關騷就可以唔使交代之前嘅「罪行」。
張話告楊朗只索賠一蚊
饅頭張噚日喺「龍門冰室/瓏門冰室」fb出post，話佢早前控告前員工楊朗誹謗，對方未有於限期內將抗辯書提交予法庭存檔，所以佢會向法庭申請，要求法庭作出判決，向楊朗提出申索，包括收回《消失了的聖誕卡》內嘅「不實言論」，同佢公開道歉、向佢支付一蚊作懲罰性賠償。
為免又俾網民狂插，饅頭張提埋楊朗之前涉嫌呃錢嘅醜聞，話「身為你嘅前老闆，見到你喺外面闖禍、有人話你呃人錢，我都好嬲自己當日請你返嚟嘅時候，無好好向你循循善誘，如果唔係今日你都唔需要喺網上承受咁多人對你嘅冷嘲熱諷」喎，好似一秒唔記得自己都有告人誹謗咁。
稱可代付訟費 被批偽善
佢仲話想楊朗經歷呢啲後會「真心改過」，又話「不過失望還失望，始終你仲係小朋友、『手足』，將來暴動罪官司如果你需要錢嘅，我幫你孭，保重」。
「我幫你孭」呢幾隻字俾饅頭張一字一空格嘅着重呈現後，果然感動咗一班龍粉，紛紛留言吹奏饅頭張有「大格局」、「以德報怨」。但睇到呢啲，好快有其他「手足」留言。「Bosco Cheung」話：「收皮啦你張俊傑......唔好拖糧先啦......已經拖左（咗）好耐啦，真係咁幫『手足』嘅就唔好拖喇......喺（係）我同一班『手足』（俾佢拖糧）。」
另一「黃店」「一起果醬」就發帖話：「關公災難過後，竟然係令人嘔心嘅偽善。」龍粉即走去圍攻，叫佢哋都做啲實質嘢幫「手足」。「一起果醬」就小學雞地話自己唔係講緊饅頭張，「點解一講偽善大家就會即刻聯想到張生？」然後又含沙射影話：「放心，實會幫手，不過唔會影相出post公告天下。」「Anita Wong」則話：「饅頭張三皮請Marco（楊朗）唔係佢自己啲錢嚟㗎，係公眾捐俾（畀）資源中心嘅營運費用呀！」
有人都覺得呢啲就係一場公關，「Cheong Lam」就話：「欺壓『手足』係鐵一般嘅事實，做乜×嘢Show都救唔番（返）」，除非佢做到「手足」嘅「五大訴求」：收回誹謗控告，公開向Marco道歉，承認一切欺壓「手足」嘅所作所為，向所有被欺壓嘅「家長」「手足」們道歉，清楚交代過去一年善款嘅下落，承諾以後不會再欺騙「黃色經濟圈」內人客、「黃店」捐款喎。 ■香港文匯報記者 文根茂