■「Lunch仔」懶理譴責，反指休台會令暴徒一鑊熟。 fb截圖「Lunch仔」對「手足」一言不合就分化，搞到班「同路人」極度唔妥佢，聲言「Lunch仔」快被「手足」圍毆，而「Lunch仔」就搬出法律條文威脅，令更多「同路人」不滿，幾十個Telegram（TG）頻道今個星期休台一周以示譴責。而「Lunch仔」就死撐，質問班人係咪要「10.1出去班『手足』睇唔到哨台，一鑊熟比（俾）你拉曬（晒）」，雙方互咬到一地狗血同花生。
「Lunch仔」喺黑暴期間博出名成功後，俾「同路人」揭發諸多「罪狀」，包括佢為呃光環，喺法庭送車時嗌口號、擋囚車去路，令警方因此拉橙帶阻隔群眾同囚車，搞到還柙嘅「工程巴」家人冇辦法送車道別。有人揭發「Lunch仔」打壓言論自由，見有人喺TG群組發文批評，「Lunch仔」就會用管理員身份移除異見，俾「同路人」鬧爆佢「打壓異己」、「行假民主」。
鬧「手足」「收咗錢」 叫人噓佢走
呢啲不滿逐漸發酵，日前喺沙田新城市廣場「和你Lunch」期間，「Lunch仔」就俾黑衣「同路人」兜口兜面質問對唔對得住「手足」、拎夠「光環」未。不過，佢就反鬧呢個「手足」「收咗錢」，仲叫人噓佢走。佢事後又喺Instagram再炒作事件，話「精神d（啲），臨時演員都係演員，你啲戲好唔掂啊」、「最後係（喺）度多謝沙田幫我噓走佢」，引來「文宣」頻道不滿，聲言「睇嚟『手足』集體圍毆你嘅日子越來越近」。
「Lunch仔」就未驚過，發文反擊「係就快」，又引《侵害人身罪條例》第十七條，話以任何方式非法及惡意傷害任何人或導致任何人身體受嚴重傷害，即屬犯可循公訴程序審訊的罪行，可處終身監禁。
要用法律制裁「同路人」嘅言論，進一步令班攬炒分子不滿，幾十個TG頻道聯合聲明，話「因最近David（「Lunch仔」）多次與『手足』割蓆（席），胡亂捉鬼，威脅報警，以及其支持者的行為，決定休台一星期以示譴責。」亦有人奉勸其他「同路人」要清除「Lunch仔」呢個「內患」。仲有人製作圖片，暗指「Lunch仔」就係引「手足」俾警察拉嘅誘餌𠻹。
誤導人10·1會去衝 點知又話唔會現身
「Lunch仔」都好識企喺「道德高地」，問班人係咪要「10.1出去班『手足』睇唔到哨台，一鑊熟比（俾）你拉曬（晒）」。講到以為「Lunch仔」當日都會衝咁，但點知佢就話自己「身份比較敏感」「為左（咗）唔想影響到其他『手足』」佢就唔會現身。聽到都覺幾耐人尋味喎。
■香港文匯報記者 鄭治祖