好多人話攬炒派最叻做戲呃支持，但傳統「飯民」啲演技似乎有待改進，事關呢班「飯民」議員喺延任前係威係勢話延任後一定會同「手足」參與前線「抗爭」，而佢哋留喺議會先可以有效幫助「抗爭者」喎，點知前日「手足」發起「月夕行動」，已經延任嘅「飯民」就失晒蹤，真係可憐嗰班被捕「手足」嘞。其實，班「飯民」已經過咗海就係神仙，仲點會做啲凡人先做嘅事呢？
前日網民喺多區鼓吹非法集結，結果全日近90人被捕，包括攬炒派區議員梁晃維、李予信、陳運通、黎梓欣，而拒絕延任嘅「人民力量」陳志全，同前「香港眾志」秘書長黃之鋒亦有短暫出現喺銅鑼灣上一上鏡，至於其他「飯民」就深潛到影都唔見。
僅毛姨fb嘴炮呃Like
由中文大學「獨」講師劉正管理嘅facebook專頁「無神論者的巴別塔」當日就發帖「歡迎」班「飯民」議員正式延任，再寸佢哋點解得拒絕「捐狗窿」嘅陳志全同幾個區議員去前線「保護市民」，再寸埋班「飯民」支持者話明明好多「黃絲」聲稱「飯民」延任先可以「救手足」㗎，「係咪『臨立會議員』呢個身份太過尊貴，我地（哋）一班蟻民無資格叫佢地（哋）落場？」
不過，帖文都有「讚揚」「議會陣線」立法會議員毛孟靜，事關佢起碼都有喺fb「好憤怒」咁轉發新聞㗎。
作為「同路人」嘅離島區議員梁國豪亦喺facebook揶揄：「請問接受委任的立法會議員有無（冇）邊個係（喺）銅鑼灣？想搵佢地（哋）幫手呀。」
網民「Roger Lam」就諷刺：「企前線畀（俾）『黑警』拉咗上庭，告入咗咪連份糧都冇埋。咁高風險，有違出糧嘅初心！」「Or Wing Kit」亦話：「佢哋有佢哋嘅『議會戰線』吖嘛，唔可以被捕㗎，唔係就失守啦！」
「Yan Ting Lam」就話：「以前成日衝嘅鄺俊字（宇）、許智峯都冇（上前線）啦」「Jackson Yeung」就回應：「都過左（咗）海做神仙啦，班議員仲出黎（嚟）托×咩？」另一fb專頁「政治大嬸判」亦留言：「咁班區議員都係啦，今日得梁晃維同李予信，其他人唔見晒（好似係）。」
■香港文匯報
記者 鄭治祖