■「人血龍門」出post話有兩間分店要執笠。 「龍門冰室」fb圖片被稱為「人血龍門」嘅「黃店」龍門冰室，噚日喺facebook宣布尖沙咀嘅Cafe同紅磡嘅分店執笠，仲講明之後「有機會再縮窄業務範圍」、「會開始大幅改革人事制度，務求短時間內令餐廳的財務狀況變得穩定健康」「未必能如以往般幫助太多『手足』」??。有「龍粉」即刻哭喪話係「飲食界最黑暗嘅一日」，但亦都有人話龍門咁難食就預咗執笠，仲寸佢︰「集中火力做好其餘分店食物質素仲好。」
經營不善賴被刁難抹黑
「人血龍門」噚日喺facebook出結業啟事，話佢哋喺尖沙咀間「瓏門Cafe」同紅磡間「瓏門冰室」要執笠。過去一年逆市擴張到8間、甚至貴四成租金開分店嘅「人血龍門」，自己做唔掂就開始賴人哋，話疫情影響、食材貴、業主唔減租、政府「故意叼（刁）難」佢哋唔發放保就業基金、被「無理抹黑」，所以佢哋「開始捱不住」喎。
「人血龍門」又藉住執笠嘅悲情時刻，扮偉大話自己「一直不敢告急」，因為知道有好多小店仲捱緊喎，同時佢又講盡醜話，話「未來或有機會再縮窄業務範圍」、「會開始大幅改革人事制度」，又話自己「短時間內或許未必能如以往般，幫助太多『手足』了」，仲話可能係以前「幫得太盡」，先搞到自己「焦頭爛額」喎。之前收咗「黃絲」咁多錢「幫手足」，??家真係過咗海就神仙嘞。
唔少「龍粉」見狀都齊齊哭喪。「Thiago Li」話︰「這是香港飲食業最黑暗的一天。」「Oscar Siu」亦話︰「希望大家唔好被人分化到啦，撐下龍門啦！」
網民：改善食物質素仲好
不過，亦都有唔少人早就頂唔順「人血龍門」。「Jacky Chan」寸龍門話︰「集中火力做好其餘分店食物質素仲好。」「Suki Wong」亦揶揄︰「個個星期都話做好本業，個個星期都話整好的（啲）野（嘢）食......你唔覺煩我都覺煩。」
「楊子龍」就質疑龍門︰「啲錢用晒嚟告『手足』？定之前入錯口罩唔夠錢找數？仲有，月餅有貨拎未？你三日唔埋兩日就出啲話邊個邊個又屈你嘅Post，你都仲夠膽寫『不敢告急』？香港人真係好好呃......」
「Kim Choy」就開始Fact-check（查證）龍門嘅言論，貼出佢過往告急嘅post話︰「邊個話龍門一直不敢告急......」佢又發現龍門個執笠啟事原來改過嚟，原本話政府「拒絕發放補助金」，後來先改口話係政府「故意叼（刁）難」。「Kim Choy」話︰「其實唔好成日講大話，用心做好本業仲好啦。」「Kit Cheung」亦附和︰「咁即係到底有冇申請到保就業基金？」
部分人仲鬧龍門死到臨頭仲扮嘢。「Jedi Hon」話︰「收水啦。扮黃！」「Stephanie Wan」亦反問︰「自己話自己幫左（咗）好多人唔會好奇怪嗎？」 ■香港文匯報記者 甘瑜