■「富東閣」見勢色唔對路即刻刪帖，再出聲明「跪低」。 fb圖片喺「黃色經濟圈」生存認真唔易，「同路人」之間成日互相「殘殺」。「人血龍門（龍門冰室）」老闆「饅頭張」（張俊傑）早前因控告「手足」Marco而被圍攻，導火線就係因為Marco寫咗本揭露「饅頭張」黑歷史嘅《消失了的聖誕卡》。𠵱家件事嘅熱度雖然啱啱冷卻咗啲，「富東閣海鮮酒家」日前卻無啦啦喺facebook上載咗本書嘅封面，佢哋即刻觸動咗「龍粉」神經而被狂插，揚言唔會再幫襯。間舖就好快刪帖，又發聲明話此舉只係單純為咗支持「同路人」，對內裏乾坤並不知情。見佢咁冇腰骨，龍門死對頭「渣家軍」都唔放過佢，寸佢一係怕是非，一係怕分清是非。
「龍粉」群起而攻 聲言不再幫襯
一股以「龍粉」為主嘅勢力，早前開咗facebook群組「渣家軍人西炒車事件簿」，日前就有人喺個群組貼出「黃店」「富東閣海鮮酒家」上載《消失了的聖誕卡》封面嘅截圖，稱「又多一間可以（上）blacklist（黑名單）」。一石激起千層浪，聚集諸多「龍粉」嘅「事件簿」群組，即刻群起而攻之，聲言不會再幫襯。網民「Andy McEveley」懷疑「莫非係佢同Marco合謀」，「Shan Chung」就不滿「又要埋渣×堆，明明唔關佢事」。
稱不知《消失了的聖誕卡》內容
「富東閣」見勢色唔對路即刻刪帖，更出聲明聲稱本書「是某顧客向店長要求支持，......收到本書膠套還未拆，本人絕不知道書中內容，出帖原意只為支持『同路人』」，又話自己係見到多方討論「在不知原因下決定刪文」，仲聲稱「只想老老實實做生意，不願在是是非非中浮浮沉沉」。
不過，入得「黃色經濟圈」，凡事由不得你。網民「?家俊」就話「告急果（嗰）陣咪大×大聲話自己『黃店』，衰左（咗）果（嗰）陣就話自己想做本業。」「楊子龍」就覺得：「你哋做得最錯嘅，係先出錯Post，之後收返再表明唔係想支持手足，咁即係當眾割蓆（席）啫！你有冇考慮過你咁做會令到幾多人誤會？你咁樣做，對唔對得住畀（俾）人告緊嘅『手足』？」
「Wishing Tree」就狠批：「咁快同『手足』割，一試就知真黃偽黃。」「Sun Leu」直情話，「一聽到啲龍粉話罷買就即刻跪低，呢啲咁冇腰骨嘅，真係唔好×叫自己做黃店囉！」
「渣家軍」一分子「Let's Jam 一起果醬」都發帖質疑富東閣：「怕是非，定怕分清是非？」雖然都有人稱可能「富東閣」只係冇時間了解當中是非，「一起果醬」都覺得「有可能」，但「一定唔係藉口」。
「Bruce Lee」就揶揄：「梗係生意要緊啦，明知蝕錢表態嚟托杉。」「Blair Shiu」就睇透「其實個老闆都係見龍衛兵話unlike，又話唔再幫帽（襯），驚影響生意而跪低」。「Alan Tsang」一矢中的，話「黃色經濟圈」「只係圍爐互相掩飾醜惡，一齊消耗『抗爭』呃細路課金，不用分得太細，也不用分清是非阻財路」。
■香港文匯報記者 文根茂