■編輯記錄顯示，梁家傑改正用返班黑衣魔幫襯店舖嘅用語「懲罰」，同更正返間餅店嘅名。公民黨主席梁家傑竟然「勇武」，走去學黑暴分子「裝修」？傻啦，呢啲離地藍血人只會叫人去做嘅啫，自己身嬌肉貴點會想「人生更精彩」吖！事緣梁家傑見昨日有人吹雞撐黃店，身為攬炒派頭面人物梗係要落場打吓卡當做咗嘢，點知佢喺fb發帖時，就話自己去咗「裝修黃店」，結果梗係俾人瘋狂恥笑。有「黃絲」就有感而發，話連「裝修」呢個詞都唔知道，證明佢有幾離地，「呢啲人仲話領導我哋爭取民主喎，領導我哋入棺材就得！」
梁家傑噚日喺fb發帖，話自己「已經裝修咗兩間黃店」，有「喜來登」餅店同金祥排骨麵，仲「巧遇余若薇」𠻹。不過，一個post短短幾句話就錯咗兩樣嘢-一、「裝修」係黑衣魔破壞人哋店舖嘅用語；二、佢幫襯嗰間餅店唔係叫「喜來登」呢。可能知道衰咗，佢隨後改正用返班黑衣魔幫襯店舖嘅用語「懲罰」，同更正返間餅店嘅名。
黃絲：連舖頭名都講錯
成班黃絲就喺「連登討論區」同fb瘋狂恥笑梁家傑。「矮肥毒×」就揶揄：「條友真係唔識架（㗎）喎！」「如果一打」亦話：「連舖頭名都講錯，舊年仲扮friend走去買月餅，原來連人地舖頭名都唔記得。」「腦魔（二世）」揶揄：「證明佢過去嗰一年都係瞓緊覺。」
「恆屍」就唔信梁家傑話自己「巧遇余若薇」：「余若薇買午餐都點秘書去買，要用私家盒死都唔用食肆果（嗰）款cheap膠，呢班人係穿著（着）得求其，但呢個係宣傳手法根本唔會睇得起基層。所以當時余若薇係（喺）d100（網台）反對全民派錢，話只會比（畀）呢班人濫用買iphone，但同一集就話希望有電動車優惠（自己想換環保車）。」
有人就覺得梁家傑同余若薇呢種藍血人有咁嘅表現係意料之內嗰噃。「Kurisu Lam」道：「廢老扮潮係咁上下啦，2020年尾都嚟緊喇裝修同懲罰都唔識分！」「ほこり ともじん」話：「連自己做緊乜都唔知，符合一貫離晒地作風。」「再見」更爆粗道：「呢啲政壇老屎忽快×啲死！扮貼地，收皮喇律師黨！」
網民：仲話領導爭取民主喎
「白禮」亦指：「見証（證）社會賢達有幾離地，又幾想貼地，可惜事與願違，好多野（嘢）扮唔到嫁（㗎），唉，收皮啦好嘛？你打卡衝出黎（嚟）×我好難扮睇唔到嫁（㗎）！」「Ar So」寸道：「跟住呢啲人仲話領導我哋爭取民主喎，領導我地（哋）入棺材就得！」
「倉爸」就幫梁家傑辯護：「老人家係咁上下啦，咁都好挑剔。」「愛爾蘭共和軍」更話：「咪分化啦，泛民家陣議會戰線前線手足黎（嚟）！」「沒有偶然」即反唇相譏：「政棍就政棍啦老人家！」「申請」直言：「其實你地（哋）訓（瞓）醒未？公民黨同成班泛民當年動議改議事規則，賦予主席無上權力同剪布，議會抗爭就係咁失效。當失效後，泛民就開始議會抗爭做大戲喇！點解要失效先咁做？因為知你真係傻仔囉！」 ■香港文匯報記者 陳川