■「良心開倉」話「手足」長貧難顧，所以決定租間劏房畀佢哋，結果被網民揶揄根本只係想收租。 良心開倉fb截圖喺「黃色經濟圈」內，「黃老闆」固然攞盡「手足」着數，但「手足」其實都唔係咩善男信女。網店「良心開倉」嘅老闆近日喺facebook發文，話自己介紹咗好多「手足」畀唔同嘅「良心老闆」，可惜佢哋嘅表現令班「良心老闆」好頭痕，而「黃絲」客人都好不屑「手足」嘅工作態度。有「黃絲」網民就不滿「良心開倉」嘅老闆公審「手足」，仲質疑佢扮到不辭勞苦咁幫「手足」，只係為咗宣傳自己間網店喎。
個個做唔長 做錯嘢反鬧客
「良心開倉」老闆喺帖文話自己近日搵過幾個「良心老闆」，所以想向大家分享吓「手足」嘅工作表現。佢話自己介紹咗逾廿個「手足」畀開食肆嘅老闆甲，而老闆甲亦唔會點監察員工，只要做完嘢鍾意打機、煲劇同煲煙都得，惟冇一個「手足」做得超過兩星期。其中有個「手足」因為被捉咗所以冇返工，雖然老闆甲承諾「手足」放監後會請返佢，點知最後大家聯絡都斷埋。
另一個經營外賣平台嘅老闆乙就大呻佢請嘅「手足」太有性格，送外賣嘅時候唔理看更勸喻，夾硬將架電單車泊喺客人嘅大廈大堂，仲爆粗鬧埋個看更，搞到客人同老闆乙都俾人煩咗好耐。以為出咗事就會收斂？呢位「手足」翌日送外賣，「送台式飲品但倒瀉左（咗）大半杯，個客梗係詐形（型）啦！」但呢位「手足」冇道歉之餘仲鬧返個客轉頭，結果搞到老闆乙要搵其他員工執手尾。
至於老闆丙面對嘅就唔係「手足」問題嘞，事關做裝修嘅奀a住「手足」去客人屋企度尺時，俾身為「同路人」嘅客人嫌棄「手足」太後生、無經驗，所以唔幫襯佢哋。
「良心開倉」老闆喺文末就「苦口婆心」，要求「黃店」老闆、「手足」同「黃絲」客人團結一致，點知啲「同路人」就唔領佢份「情」，令佢忍唔住開post大呻，話自己去年用盡積蓄租酒店安頓「手足」，可惜長貧難顧，唯有租咗間劏房畀佢哋喎，又話自己搞完網站後生意反而跌咗六七成，??家仲要俾「同路人」情緒勒索。
雖然講到自己好慘，但「良心開倉」仍「保持理性」，喺文末貼返網店嘅連結：「如果你認同我理念，咪支持吓我、幫襯下（吓）我囉。」
不過，「黃絲」網民一直只問立場，不問是非，紛紛噬咗個老闆先。「Anthony Li」揶揄道：「真係好難為你喎，個個月係（喺）度收租。」「Alethea Yim」就質疑：「似乎係你開鋪（舖）想賺『黃圈』錢但做唔起，然後喺度怨『手足』多啲喎。」
「黃唔係大晒 被淘汰好正常」
「Alan Tsang」就話「良心開倉」係想借踩「手足」嚟抬高「黃店」：「呢個PAGE應對已經清楚睇到，佢哋無繼續理解離職員工求真相及援助，只係幫啲生意佬扮『黃』，邊呃『抗爭』資源，邊憑片面之詞誣衊『抗爭者』擺上網公審。」
另一「黃營」fb專頁「九龍灣外賣專員」就話要「公道啲」：「『黃』唔係大晒，只係一張入場券，無論我哋定『手足』，做得唔好比（俾）巿場淘汰都好正常。」「James Wong」就話：「有啲書都未讀完就衝咗出去，冇社會經驗但又唔肯學，一唔啱聽就走真係唔要得。」 ■香港文匯報記者 雨航