■尹光跟苑瓊丹談到「廟街王子」之名的由來。香港文匯報訊 （記者 李思穎）尹光接受苑瓊丹主持的電視節目《開工大吉77》訪問，大談「廟街王子」之名的由來。他出生於越南，當年因逃避兵役，便移居香港，其父經營不少行業，有電影院、髮型屋，他說：「當時戲院不論播大戲定電影，我屋企都有個喇叭聽到晒，漸漸開始鍾意呢行，後來同細佬來到香港，怎樣也找不到工作，最終朋友介紹我去唱歌，起初每晚在荔園『粵曲歌壇』唱兩首粵曲，都有一兩百人睇！」
尹光後期轉戰夜總會任歌手，但選曲成為另一個難題：「因為要唱國語歌，自己國語唔標準，學得8首歌，要搵其他歌手幫手，人生第一個拍檔係鍾叮噹，一齊做電視台節目，收工之後就要幫啲粵曲改歌詞，後期到我推出《14座》呢首歌，當年好受歡迎，廟街街頭播到街尾，最終大家叫我做『廟街王子』。」
尹光登上紅館開騷，最感恩伯樂是已故的「演唱會之父」張耀榮：「當年張生有幾日檔期唔知搵邊個『攝』，原來佢鍾意聽我唱歌，所以託人同我接洽，當時12,000個位，賣咗兩個星期飛，都係賣得兩三百張，嚇到我同張生講『我唔做啦，我退返啲訂金畀你』，佢話唔得，要繼續做。到開騷當日我去化妝，老婆話出邊排晒隊買飛，我唔信！要親自出去睇吓，真係打咗幾個蛇餅，賣飛賣到夜晚9點幾，最終都9,000人入場，係一個奇跡。」