所謂講錢傷感情，真係連「手足」都冇面畀。近日涉嫌違反香港國安法並已潛逃外國嘅通緝犯「攬炒巴」劉祖廸日前喺facebook宣布與Stand with Hong Kong（SWHK）團隊「和平分家」，並提出由民間投票決定點樣重新分配之前大家一齊眾籌返嚟嘅資金。最後，有五成人認為要「五五對分」，但SWHK梗係唔肯啦，仲另發聲明稱眾籌資金受法律約束，劉祖廸要動用眾籌資金可以按「制度」申請審核。唔少網民都質疑SWHK想獨吞巨款，SWHK即發聲明更名為「重光團隊」，聲稱仍會「公平公正」咁用錢，希望大家相信呢個「機制」，但網民就質疑管理資金嘅財務委員會都係「重光」嘅人，隨時中飽私囊都冇人知。
網傳「攬炒團隊」喺境外網站發起嘅眾籌金額達3,000萬元，而劉祖廸早前就稱結餘約1,600萬元，並提出分家，點知護錢心切嘅「重光」死咬唔放，仲搬埋法律出嚟拒絕分家，又扮好人咁話如果劉祖廸團隊需要動用眾籌所得嘅資金，可以透過既有制度申請撥款，財務管理人員定會謹守一貫嘅審核標準處理所有申請方案喎。
網民批「重光」食相難睇
不過，唔少網民都替劉祖廸唔抵，仲批評「重光」唔止唔做嘢，仲想獨吞巨款。被「同路人」窮追猛打，「重光」唯有再發聲明解畫，話外國因為疫情及其他議題，現時根本唔會留意有關香港嘅遊行，又話財務管理委員會早喺去年7月團隊成立嗰陣，已有全體成員一致同意成立同採納嘅機制，委員會亦會定時換人，確保做決定時「考慮唔同角度、公平公正，做到物盡其所。」
「重光」仲話：「我哋發現喺唔同戰綫（線）嘅圈子都不斷有人分化、詆毀同抹黑『重光團隊』。」希望大家相信佢哋個終極目標係「光復香港」。
不過，網民就仍唔收貨，「ThomasHealy」就喺「連登」開post批評「重光」食相太難睇：「D（啲）錢捐果（嗰）時明明比（畀）攬炒團隊，依（??）SWHK搶曬（晒），咁可否全數退錢？......佢地（哋）改埋名，慌死比（畀）人追債咁。」佢仲摷返當時決定攬炒團隊點樣分家嘅投票結果出嚟：「支持SWHK/『重光團隊』羅（攞）多過一半的人只有8%，你都敢大大聲話自己要吞曬（晒）？」
但「-_-_-_-_-_-」就話劉祖廸都唔好得去邊：「明明finn（劉祖廸）自己出post話自己出黎（嚟）做，你講到好似係swhk主動咁，真係以為大話講幾次就係真咩？」
■香港文匯報記者 雨航