國泰集團近日大規模裁員，好多人都話除咗疫情因素，參與黑暴嘅國泰同港龍員工都有份種下自炒禍根。攬炒派區議員岑敖暉噚日喺facebook講到明，話「攬炒的過程必然會傷害到自己，或者手足」，而「企業相繼執笠、越來越多人失業，這個是追求『攬炒』必然會經歷的過程。也是攬炒的『基本』」喎。不過，佢又自相矛盾話，「當初決定攬炒嗰陣應該預咗要救『手足』」喎，咁救返生又點叫「攬炒」呢？有網民質疑：「當黃圈都被一齊攬炒埋果（嗰）陣，仲有咩人救手足？」有人更揶揄：「咁你肯將眾籌既(嘅)錢派出嚟救手足嗎？」
連登仔狂踩國泰「手足」
喺連登討論區，成日講要齊上齊落嘅「同路人」唔止冇向國泰港龍航空被炒班人伸出援手，反而踩多兩腳，話呢班人係「飛雞」，抵佢哋死咁話。「同路人」有難仲要踩多兩腳，呢啲咪係真「手足」囉。
岑敖暉就喺帖文發牢騷，話大家去年開口埋口都提住攬炒，咁就應該知道呢場「運動」係要犧牲、自傷，??家經濟下行、外資逃離，加上企業執笠都一定會令「手足」被炒同埋搵唔到工，呢個時候「同路人」、特別係「黃圈」應該要救「手足」而非落井下石，否則根本冇人會繼續真心支持攬炒。
黃民批岑只顧自己「荷包」
黃絲網民就似乎唔多支持岑敖暉嘅講法，「May Chan」就話：「叫撑（撐）『黄色經濟圈』係（個）邊d（啲）人袋錢呀！係『龍門』『渣哥』『基哥』『明姐』呀！」「Cindy Chan」直情話：「所謂不怕攬炒，最簡單的就是確保自己係有糧支，荷包富足至真！」「Wd Woo」就話：「唔覺得香港人有擁抱攬炒。」「Stephen Lee」回覆話：「唔好炒左（咗）自己份工就得。」
「Cantor Liu」就狙擊岑敖暉：「咁你肯將眾籌既（嘅）錢派出嚟救『手足』嗎？」「Ray Lee」就回覆：「可能一陣又話要支持失業『手足』搞個眾籌出嚟，??家出呢篇文咪提醒『手足』交會費囉」。
「Mimi Chan」就搲晒頭：「人就自私嘅，大難臨頭各自飛唔係好正常咩？」「Leo Chan」就揶揄：「『手足』走晒仲有邊個捐錢畀呢班人呀，又有千萬豪宅又有得去五星級酒店爆房！」
工聯會立法會議員陸頌雄都轉發帖文，想要大家了解下攬炒派奇幻而冷血嘅世界，「大家要繼續擁抱攬炒，香港失去國際地位『手足』失業都在所不惜，是必然的過程，但攬炒不包括政棍自己的利益，佢可以繼續搞選舉搞眾籌，一定要有『糧支』。」 ■香港文匯報記者 雨航