成日話自己會聽取市民意見嘅攬炒派，竟然唔准市民發聲？自稱「藝術家」嘅程展緯，喺大埔區議會討論有效改善區內環境衞生問題時，表達希望出席大埔區議會轄下嘅環保、漁農、工商、食物及衞生委員會，就大埔翠屏花園街市一帶嘅衞生問題發表意見嘅，點知被委員會主席劉勇威告知，有議員反對佢出席會議。程展緯事後喺facebook公開事件，發現有網民亦曾被其他區議會拒絕參與會議，難怪經常有人批評今屆區議會都漠視民意，一味掛住搞一言堂啦。
為準時收工拒市民參與會議
程展緯喺本月14日喺fb發帖，呻自己用咗好多時間心力去研究街市生態，諗住同區議會分享點解決區內衞生問題，「但他們總好似要和我競爭，拒人千里。」
程展緯其後向《獨立媒體》話，自己睇直播時得知大埔區議會將討論區內街市衞生問題，於是留言希望參與會議，點知慘食閉門羹，仲話佢事後試過向委員會主席劉勇威提出要求，但對方就話有議員反對佢出席。
《獨立媒體》其後證實反對程展緯出席會議嘅議員係區鎮樺，理由係「萬一第時有其他大埔市民話要上嚟，咁多個議程，10幾個人上嚟我哋點控制？」咁講法，睇嚟攬炒派覺得準時收工重要過聽民意喎。
所謂「有眼不識泰山」，原來程展緯係攬炒派自己友：2016年，佢喺得悉時任特首梁振英到訪其女兒就讀的學校時，就以家長身份到場舉牌抗議，獲頒香港藝術發展局藝術家年獎後，更公開要藝發局拒絕邀請梁振英出席頒獎禮及擔任主禮嘉賓等等。
踩着自己友搞到「黃絲」群情洶湧，劉勇威急急撲出嚟話可以預留10分鐘畀程展緯。坦白講，如果唔係程展緯唔係「同路人」，睇怕佢都唔會咁樣遷就對方。不過，程展緯似乎唔想要呢啲「施捨」，最終拒絕出席會議。
反咬程展緯好抆水先通知佢
劉勇威似乎諗唔到自己友都咁唔畀面，公開打佢臉，所以自己友都冇情講，反咬程展緯喺開會前好抆水先通知佢，令佢冇時間了解情況同通知其他委員喎。
程展緯其後就喺fb發帖，話自己聽完當日6.5小時嘅會議錄音後「好無力，好想去食一枝雪條急救一下（吓）」「大家都可以聽下（吓），駡（罵）足六小時，到最後成個會食環小販隊都沒承諾什麼，個委員會個名明明環保行先，但就沒有傾過街市什麼環保面向」。
估唔到同啲「素人」區議員相交甚篤嘅朱凱廸都揶揄：「聽講每人發炮30分鐘，實在想學下（吓）野（嘢）。」「Brian Wu」就tag咗區鎮樺：「哦，原來多議程，多市民就唔可以發表意見，解決提出問題的人就解決了問題，咁我睇唔到大埔有咩空間要俾（畀）你繼續做代議士。」「Ng Cheuk Hang」則有感而發，話荃灣區議會一樣係唔畀街坊主動去表達意見嘅：「有些區議員對公民社會很大戒心，想自己score（攞分），視團體為假想敵。」
■香港文匯報記者 雨航