■梁衍忻見工作小組因「同路人」唔出席而流會，大鬧佢哋唔做嘢就唔應該入工作小組。梁衍忻facebook截圖攬炒派區議員嘅工作表現，差到連「同路人」都頂唔順。記得「素人」區議員年初上任嗰陣，個個誓神劈願咁話會全力投入地區工作，仲搞咗一大串工作小組出嚟，點知西貢區議會轄下文化、歷史及體育工作小組近日竟然流會，激到小組召集人梁衍忻炮轟「同路人」冇紀律，又踢爆某啲議員入小組至今從未出席過任何會議：「唔工作，做咩又入工作小組？」
專員打電話叫區員返嚟開會
「黃絲」區議員互鬧嘅場面並唔罕見，但好似梁衍忻咁鬧到叫人走就真係第一次。涉事小組當日朝早9點半舉行會議，唔知大家忙緊乜「大事」，只得5個議員準時出現。區議會秘書處同助理專員期間不斷致電，提醒其他議員趕返嚟開會，因為根據《會議常規》，如果會議開始後15分鐘都唔夠三分一人出席就會流會。
原本以為全個小組都係「同路人」就唔會出事嘅梁衍忻，最後好無奈咁宣布流會，但就決定繼續留喺會議室，事關佢今日專誠邀請到幾個非常設團體代表嚟討論區內保育問題，實在唔想因為流會要人哋白行一趟。佢其後又向媒體批評「同路人」唔尊重民間團體嘅意見，更遑論革新。
雖然秘書處都講明流咗會繼續傾只會當係「交流會」，但梁衍忻仍堅持開會，本來傾落都好哋哋，點知開咗會成個鐘後幾位「同路人」先姍姍來遲，激到梁衍忻終於忍唔住：「如果你係唔會出席我會議，我希望你退出我個小組。」
猛搞小圈子白逗人工
佢又疑似暗寸「同路人」白逗糧，話區議會並冇強制要求議員加入工作小組，所以「入得嚟係要做嘢、要做功課發言，嚟齋坐係冇意思。」
唔少網民睇完梁衍忻喺facebook轉發嘅報道後都怒火中燒，話要質問班區議員去咗邊，但「FH Chan」就試圖為佢哋護航：「咁有啲議員落手落腳跟case，真係可以好燒時間。」「Kelvin Yu」就反駁：「但唔係今日先知道要開會吖嘛，我無記錯的話上次開會應該會定埋日期，除非病，唔係真係搵唔到一個合理既（嘅）理由唔去開會。」
「FH Chan」其後就想尋根究底，問係咪班西貢區議員私下冇交流先搞到流會，「Kelvin Yu」就回應：「印象西貢分小圈子既（嘅）情況係比較明顯，小（少）交流都不足為奇。」
有網民就讚梁衍忻鬧得好，「Eldred T H Hui」仲建議佢進一步攻擊「同路人」：「要開批鬥大會，批鬥唔到又唔出聲既（嘅）人！」「Ka Kit Yeung」亦氣憤難平：「班×議員是咁上下，選民記住班出糧垃圾，選時見人，選倒（到）走人！」「Sam Lam」就十分驚訝：「咁早現形？」「Luke Wong」就話：「香港幾難得先有份咁筍嘅工，點批鬥都炒唔到佢。」 ■香港文匯報記者 雨航