「黃納粹」又再趕盡殺絕「黃店」。「黃店」「饗車仔麵」近日俾「黃絲」圍鬧佢向警方交CCTV片，令警方有證據告多十幾個「手足」。噚日，「饗車仔麵」終於蒲頭，主動喺facebook發聲明認「衰仔」，話自己的確有將CCTV片交畀警方，過咗一年多後感到「萬分內疚」，於是決定即日起停止營業喎。不過班「黃絲」唔收貨，認為「饗車仔麵」過多一排就會捲土重來，似乎想追殺呢間舖三生三世咁。
「饗車仔麵」噚日發聲明，指警方於去年9月登門並出示法庭搜查令，要求佢哋交出CCTV記錄，但佢哋「鑑於初其（期）對法律知識貧乏，只知道『狗隻』（警方）出示搜查令，我地（哋）必需（須）提供配合。而非網上言論所說翌日或近月自願交給警方」，講到自己奉公守法都好委屈咁。「饗車仔麵」又話因為呢件事，佢哋「難辭其咎感到萬分內疚」，於是決定即日起停止營業。過咗一年幾先「內疚」又得，得咗。
雖然「饗車仔麵」已決定收檔，但「黃納粹」繼續唔收貨。「Warm Warm Hello」質疑佢點解無主動去尋求法律知識，「你現在累十幾個人被起訴暴動，以上甘（咁）大段野（嘢），一句對唔住都無，毫無誠意，你當香港人係傻架（㗎）？你交片果（嗰）時如果有諗下（吓）被起訴要坐幾年監，你會好主動去尋求法律知識，但你無咁做。」
「Lagavulin Billyham」就認為佢只係趁個市弱先執笠︰「明知都唔會有人幫襯，襯（趁）第四波，執一執，遲下改個名先。」
不過，「黃絲」最叻分裂再嗌交。「Jay Rila」發帖質疑點解淨係針對「饗車仔麵」，又翻舊賬話「黃店」「大門橫丁」喺「旺暴」時都交過CCTV出去喎。
「熱血時報」嘅陳秀慧就出嚟食花生，「其實一般人法律知識不足有乜咁出奇？......我只係可憐『黃絲』對食政治飯的（嘅）人包容度那麼高，犯多少錯，投錯多少票，『黃絲』都會包容，要『不分化不割席』。但對一間普通商舖的包容度卻那麼低。」佢仲叫大家再諗諗值唔值得做「黃」嘅一員喎。
有啲人就慨嘆「黃絲」又鬥死「黃店」。「Cyrus Li」揶揄︰「批鬥成功，『黃絲』開香檳？」
「Mini Phoebe」道出「黃圈」現實︰「『黃絲』要你三更死。那（哪）敢留人到五更？」 ■香港文匯報記者 郭家好