●「怪叔叔」盧熾剛幫財仔賣廣告，俾網民大罵無良知。漫畫家「怪叔叔」盧熾剛（Cuson Lo）喺修例風波時，經常喺facebook發表大量煽暴及散播仇恨嘅漫畫文宣，一度被「黃絲」標榜為「有良心」。但佢日前接咗嗰私人貸款廣告，就俾一眾網民鬧爆，不滿佢幫貴利佬賣廣告，又話呢啲財仔會害到後生仔成世還債，大罵「怪叔叔」變「大耳窿」咁話。
同「熱狗」一向好friend嘅「怪叔叔」之前接到商家廣告，幫手宣傳一間韓國企業研發嘅所謂「穿戴式空氣清新機」，講到戴咗之後可以過濾一堆細菌云云。結果呢，「熱狗」喺疫情期間一直聲稱戴口罩以至政府其他防疫措施都係「政府用來限制港人自由嘅陰謀」，同樣係親「熱狗」嘅「手作達人」吳斯翹「Billie Ng」就企出嚟揶揄個口罩「勁似狗口罩」，唔少網民亦質疑「怪叔叔」為咗收廣告錢而誤導市民。
日前，「怪叔叔」又再接咗個私人貸款公司嘅廣告，仲畫咗成頁漫畫，調侃自己朋友一聽要借錢周轉，一個個即刻走晒，只有呢間公司願意借錢幫手。佢仲寫咗段廣告獨白：「真正嘅友情唔可以用錢衡量，因為一講到錢就冇㗎啦。我呢班果然係真朋友，不過周轉就梗係搵兄弟啦！」
網民與業界恥笑冇良心
網民「Siaki Hung」就對盧熾剛今次做法好失望﹕「最不屑啲財仔廣告講到借完唔洗（使）還咁，仲有無得借錢就等如無得shopping去旅行咁，真係痴（黐）×線。」「Elaine Chan」亦不滿曾經嘅「良心」漫畫家「墮落」成咁，直言超失望，「呢啲財仔真係害好多細路一世還債。」「Chung Wai Lam」亦話：「攞綜援好過欠卡數、借財仔啦。」
「Nash Lam」就鬧盧熾剛為咗錢放棄良心﹕「都啱ge（嘅），良心值幾錢。」「Matt Lee」諷刺盧熾剛嘅facebook主頁名字「怪叔叔の散步道」，話佢係「大耳窿no散步道」。
早前經常同盧熾剛「捆綁」出現嘅漫畫家「草日」梁仲基，亦被網友點名問點解無出現喺呢個廣告漫畫中。「Sarah Ho」仲問佢哋係咪「絕咗交」。「Suki Ho」就話，「擺明『草日』老師唔會接呢啲廣告喇。」又打咗盧熾剛一巴。
其實呢，搵人賣廣告真係要搵啱人，如果唔係，分分鐘會帶嚟反效果㗎！●香港文匯報記者 杜思文