●「Mirror」成員代言美心同Deliveroo。 連登截圖連登仔：當「手足」係condom
成日要淨化黃色經濟圈嘅黃絲面對住偶像嘅「變節」，究竟會作何反應呢？近排喺香港紅到發紫嘅男團「Mirror」深受黃絲追捧，其中嘅姜濤更「迷倒萬千少女」。點知，呢個「黃絲精神領袖」近日走咗去代言一啲黃絲眼中嘅藍店，咁樣究竟係要叫黃絲情何以堪呢。不過唔使驚，慣咗搬龍門嘅黃絲自有一套，因為佢哋有種解畫方式叫「N重標準」，搞到佢哋連偶像係賺藍店前再幫襯黃店、有人別有用心咁想整死香港本土流行文化呢類胡話都噏得出。有連登仔忍唔住話：「大眾對Mirror嘅雙重標準可以睇得出黃圈呢個定義其實好有問題！」●香港文匯報記者 倪思言
「Mirror」成員Stanley早前為美心旗下品牌「Shake Shack」同外賣平台「Deliveroo戶戶送」代言，而呢兩間商戶一向都被黃絲標籤為「藍店」，尤其是美心呀，黃絲對它簡直係「恨之入骨」。喺修例風波期間，黑暴期間多次放火、打爛美心及旗下食肆嘅舖頭，仲聲稱要罷食、罷買。
毫無原則 怪論為偶像開脫
不過，當自己鍾意嘅團體成為代言人，黃絲就馬上立場行先，唔只即刻轉晒軚支持，仲要想盡方法為對方開脫，一時又話賣廣告無問題，一時又話賺藍絲錢係好事。連登網民「intothe銀窿」甚至腦補：「『Mirror』只係藝人，佢係收美心嘅錢，（但）平時自己都未必會食，而且佢都未必知道嗰個乜×品牌係美心旗下，可能就咁中伏。」
睇返「Mirror」最火嘅成員姜濤亦有為麥當勞、茶木、滙豐銀行等黃絲覺得係「藍」嘅商家代言，但立志要「擺脫奴性」嘅黃絲點會計較呢啲「小節」吖，好多人聲稱賺「對家」錢無問題、做artist唔接廣告邊有收入云云。有啲黃絲唔知係見到一條新思路，定係頂唔順黃店實在太難食，於是話因為姜濤代言而會重新幫襯藍店，「邊個唔食美心就係鬼」云云。
為咗說服自己，有連登仔更出咗數千字嘅長文幫mirror嘅fans解畫，要反思「黃圈」嘅定義，仲得出「佢只要一日唔係幫『極權』宣傳咩思想，我一日都唔需要當佢係藍或者要抵制佢」嘅觀點。「要靜去自修室啦×」嘅創作力量同幻想，就更嚇你一跳：「另一個角度睇，連美心都要搵 Mirror 賣廣告，證明黃圈勝利在望！」
有人就企圖轉移視線，「賤種公僕」就發帖話「點解係× mirror而唔係×接job既（嘅）經理人」，仲叫黃絲「認清敵人，藝人無得say no」云云。
話姜濤曾衝擊立法會鬧警察
「解密工作室」就唔知係真爆料定係靠害：「聽人講佢（姜濤）有份衝入垃圾會，仲有份派物資，仲同唯唯一齊×狗。我就聽人講嘅，佢咁易認。」
「賤我感覺良好」發帖反擊：「Mirror賣美心，hsbc廣告都仲要盲撐，教識我咩係condom。坐緊既（嘅）手足，原來真係手joke。有冇諗過，當年人地（哋）就係『裝修』元氣、美心、Starbucks。呢（𠵱）家，有個自稱/被稱黃既（嘅）叫人去食，仲要成村人護佢。多謝晒你哋，定2021年大家覺得佢地（哋）真係抵坐？自己拎（攞）黎（嚟）？」