無知而犯叫做愚蠢，明知故犯就係無恥。記得前年黑暴期間，黃媒喺冇任何證據下，一口咬定一名少女被警員用布袋彈「射爆眼」，結果俾黑暴分子大肆炒作，用「黑警還眼」嘅口號鼓吹黃絲連續3天癱瘓機場。有傳媒噚日圖文並茂踢爆原來「爆眼女」唔只冇爆眼，而且去年已經前赴台灣。不過，臉皮厚度破咗世界紀錄嘅黃絲就反咬呢啲係「假新聞」，甚至話無論真相係點都會撐「爆眼女」，令呢個原本已經醜出國際嘅消息更加肉酸。
有關報道噚日引來大量迴響，唔少網民都批評呢個令當年逾千航班被迫取消嘅世紀謊言，但有黃絲就喺「連登」以「點都撐爆眼少女」為題開post，話見到「爆眼女」冇事就安樂晒，網民「借左聾耳陳隻耳」仲話：「無爆我仲開心，吹呀。」
不過，「攝衫的T仔」就批評帖主前設有問題，甚至質疑有關傳媒造假：「你點知（爆眼女）冇事？你肯定冇視力問題？你肯定冇精神損傷？你肯定係佢本人？一年後，搵個五官似樣嘅、睇落冇表面損傷嘅人。」「扮工署專員」就深信「爆眼女」有爆眼：「化妝加義眼根本睇唔出，但其中一邊視力已經無（冇）咗。」「日陽西下」就話：「唔比（畀）係啲醫生勁，醫返好佢隻眼？」
記得「爆眼女」當年帶起咗用手遮住一隻眼嘅標準黑暴手勢，fb專頁「全民??實你」就貼返當年多名醫護遮住一隻眼罷工嘅相，並批評：「依（??）班毫無醫德嘅黑醫護係咪欠香港人，尤其係當時嘅病人，一個道歉呢？」「Hung Ho」就話：「如果單眼女真係過台灣，呢班黑衣護，真係要搵返晒佢哋出嚟，講聲道歉！」
「Alvin Lai」就揶揄：「人有相似啫，唔係佢嚟嘅（手足邏輯）」「Yau Chris」就建議慳返啖氣：「初頭比（俾）人吹到爆曬（晒）眼骨呀，又爆眼珠，算啦，扮訓（瞓）既（嘅）人係唔會醒，請keep住自欺欺人。」「Chan Ho Lam」就批評：「好心啦，當日塞咗機場幾日，啲旅客已經好不滿，今時今日衰咗仲要死撐，根本國際醜事。」
其實時間的確係最好嘅證人，黃媒、黃絲之前熱炒嘅「831太子站死人」、「新屋嶺強姦案」，到最新呢單「爆眼女」，都係隨時間流逝令人明白咩係假新聞。不過，點解黃絲至此仲要「力撐」，因為扮瞓嘅人先永遠唔會醒囉。 ●香港文匯報記者 雨航
