■「學民」公佈「法援」賬目，河童是6名受託人之一。 fb截圖香港文匯報訊（記者 羅旦）去旅行有人包旅費，連打官司都有人包訟費，仲要自己批畀自己，都咪話唔過癮！已經「解散」的「學民思潮」，前晚在fb公佈了其「法律援助基金」的「賬目」匯報：在75萬元中，32.5萬都用喺幫前「學民思潮」召集人、現「香港眾志」秘書長黃之鋒身上，其他同期都有官司在身的「學民」成員，例如林淳軒同林朗彥呢？唔通咁有錢自己畀晒錢打官司？最勁嘅係黃之鋒（河童）自己係負責審批撥款嘅受託人之一，唔知算唔算有利益衝突？
75萬爛賬 河童佔32.5萬
「學民」前晚深夜在fb發佈於3年前「法律援助基金」2016/2017年度「財政匯報」。
匯報稱，「學民」已按照去年3月20日所公佈的財政安排，撥款75萬元正予鄧王周廖成利律師行管理的「學民思潮法律援助基金」，以支援「所有」任職「學民思潮」成員期間，參與行動後所面臨的官司、審訊和檢控所須律師費用。
匯報續稱，基金受託人於去年12月24日通過動議，撥出32.5萬元正予「Vidler & Co Solicitors」（韋智達律師行和石書銘大律師），以支付成員黃之鋒於中聯辦燒白皮書案被控阻礙公職人員執行職務的法律訴訟費用，令基金目前尚餘42.5萬元。基金的詳細核數報告將於稍後公佈。
嘩，照匯報咁睇，咪大部分錢都係幫黃之鋒畀錢？
仲有，該基金負責審批的6名受託人，包括黃子悅、周庭、許樂絲、陳寶玲、鍾禮謙，仲有最緊要嘅黃之鋒。睇匯報，唔見佢有避席喎，咁算唔算有利益衝突？
林淳軒林朗彥「不受保」
翻查資料，有官司在身嘅「學民」成員點止黃之鋒一個，剩係舊年，林淳軒就因被控暴動罪要上庭，仲有趁特首梁振英到沙田出席施政報告及財政預算案地區諮詢會時，衝擊警方防線及拉扯警方鐵馬，事後被控兩項非法集結罪嘅林朗彥呢？唔通兩個人申咗法援？
可能「雙林」好有錢，自己畀晒訴訟費用啦！不過，「眾志」主席羅冠聰做咗立法會議員月入10萬都想申請法援打DQ官司啦，但又唔見黃之鋒去申請法援嘅？係咪因為有人「包底」？咁就不得而知嘞！