喺小巴講句普通話都要叫人返內地咁惡？講緊嘅就係曾公開鼓吹「港獨」嘅「新民主同盟」譚凱邦。譚凱邦前晚喺facebook出文，話自己喺小巴聽到最少有3個人講普通話，「我真係好想大聲同佢地（哋）講，『唔講廣東話，不如你地（哋）番（返）大陸（內地）啦！做乜落黎（嚟）。』」反對派嘅時事評論員梁啟智都睇唔過眼，留言反問︰「如果只是他們互相之間講，而唔係迫你同佢講，借問聲關你乜事？」不過，亦都因為咁，雙方就開始罵戰，「獨派」就鬧梁啟智「左膠」、「禍港」，幫梁啟智嘅就鬧佢哋「有偏見」，並直言︰「作為政治人物，就算你有偏見，都唔適合公開散播仇恨，咁樣只會對你不利。」 ■記者 甘瑜
譚凱邦前晚去完「香港眾志」黨慶，搭小巴聽到前中後排都有人講普通話，隨即躁底出post，話想叫佢哋返內地。唔少「獨派」都畀like支持，包括「天河明人」、梁金城等，連自己阿媽都係來自內地嘅馮敬恩都有畀like。
不過，講句普通話都唔得咁霸道，就當然都有唔少人唔認同。梁啟智就留言反問︰「多口一句，如果只是他們互相之間講，而唔係迫你同佢講，借問聲關你乜事？」
梁啟智一留言挑機，罵戰亦自此開始。有人就留言鬧佢「左膠×頭」、「就係你地（哋）d（啲）知識份（分）子咁on（戇）×」等等。
梁啟智都照樣反駁留言︰「如果真係要兩個人之間傾計（偈）都要用廣東話先算係入鄉隨俗，統計話其實在港日本人先係最唔肯學/學唔識廣東話的族群。」
譚凱邦就回應話，自己係覺得有太多人講普通話，而唔係語言問題，並指責梁啟智「你最鐘（鍾）意扯開話題，日本人會唔會每天來150個，一年5萬個，根本難以比較。」佢仲要求梁啟智即刻表態「贊唔贊成減單程證」。
梁啟智話晒都寫開評論，當然唔怕同譚凱邦罵戰，長篇留言道︰「 你原句係『唔講廣東話，不如你地（哋）番（返）大陸啦！做乜落黎（嚟）』，而唔係『做乜咁多大陸人架（㗎）』。你個emphasis（重點）好明顯響語言度。......你原句是針對語言，我先同你講語言。宜（𠵱）家你又同我講人數，好似轉移焦點果（嗰）個係你唔係我。」
梁啟智又再列數據，指香港住咗超過10年都唔識講廣東話嘅人有10.4萬，當中以普通話為母語嘅得9,000幾人，「in other words（換言之），唔肯學廣東話的普通話人，係少數。......你要減單程證，無非係要減大陸『移民』數目。要減幾多？10年後減到每日100好唔好？我唔反對架（㗎）。因為naturally（自然地）按個population trend（人口趨勢），10年後的需求量係會減到每日100個。」
不過，同「獨派」講道理、講數據，最終都只會嘥氣收場。譚凱邦堅持︰「若大家再沒有危機感，廣東話遲早消失。」「KingMing Chan」就調返轉話︰「 同『左膠大愛』是不能夠講道理的。」「Yan Chan」仲鬧︰「『左膠』混淆視聽，而（𠵱）家唔係辨（辯）論比賽，唔係法庭審案，而（𠵱）家係香港人對係（喺）日常生活所遇到既（嘅）事作控訴，有咩問題？德國人係咪要說服人先可以趕走難民？」