■「教主」分享傻根的帖文。 fb截圖「教主」黃毓民近排向「叛徒」黃洋達，同埋昔日戰友「國師」傻根（陳云根）開火，話佢兩個喺「熱普城」（「熱血公民」、「普羅政治學苑」同「城邦派」）散晒之際仲玩清算，連支持佢兩個嘅「網上遊魂」都唔放過。唔知係咪食返政界「大和解」條水，傻根前晚喺facebook度同「教主」稱兄道弟，話當日同佢交談甚歡，仲同網上嘅清算行為劃清界線，聲稱自己已經完成「清理門戶」嘅工作，網民要算都唔好算到「教主」頭上咁話。「教主」亦明顯熄咗火，對傻根個post（帖文）又like（讚好）又share（分享）。
兩邊大佬睇嚟想單嘢就咁算數，但都係嗰句：「村民唔係咁諗。」傻根嗰邊叫「教主」道歉先，「教主」嗰邊就戥俾傻根清走嘅「無待堂」盧斯達可憐。
傻根前晚喺facebook度稱呼「教主」做「毓民老兄」，話佢哋曾經喺珠海書院一齊教書，「幾十年朋友，彼此稱兄道弟，肝膽相照。」
佢提到自己同「教主」之間點樣和而不同，好似佢反對全民退休保障，但「教主」贊成等，「然而『本土』、『民主』、『反共』的立場，大家都同意，毫無異議。」
話門戶已清 咪鬧黃毓民
講到清算，傻根話「教主」都算遷就自己，好似《本土新聞》創辦人曾焯文喺上年立法會選舉時調轉槍頭之後，「教主」亦都將佢請出網台MyRadio。傻根仲話佢嘅「清理門戶」工作已經完成，「故此現在網上的清算行動，也只不過是借了我以前的『清黨令』來批評其他支持『港獨派』的網民」，而即使要清算「偽港獨」者都唔應該攻擊MyRadio同「教主」。
傻根之後喺個post度留言補多幾句，叫「熱普城」三方「和而不同，潛龍勿用」，仲話自己當日同「教主」仲有「台長」梁錦祥交談甚歡，「大家甚為歡喜。」
本來無搞事 何來釋前嫌
前中學中文教師、選舉時幫過傻根站台嘅莊元生留言話：「欣喜見到『國師』此言，當事人已冰釋誤會，坦誠相告，期盼他人（『教主』一方）不要再生事端。」不過「Wong Wai Nok Samuel」條氣就唔係好順：「我×你啦，誤咩會，只係陳雲（陳云根）厚道。講到生事端，你同返毓民同（MyRadio節目總監）Marco佢哋賣台嘅人講就可以了。」日前俾「教主」開名鬧嘅「藍鳳凰」亦都話：「冰釋前嫌？Day1都已經講過同陳雲冇關，既然冇關，冰咩釋前嫌？」
「Crystal Li Yuen Man」就話明白要息事寧人，只係有啲冤屈咁話，「其實不是求什麼，（要求『教主』）道歉也卑微的不強求了。只是想有一句『知道，會留意』，而不是什麼『網路街童搞事』。又或者佢承諾約束吓下屬。」「Ken Chan」都講：「至少黃毓民要就佢手下嘅所作所為道歉，如果唔係只不過係強行壓下大家怒氣同疑慮。」
「教主」facebook亦都share咗傻根呢個post，不過有啲支持者仍然對傻根牙癢癢，好似「Fandy Law」咁：「嘩，頂佢個肺，講到自己全部合理，被佢指出的必然是犯賤......打死我都覺得，『盧斯達』是不公平下的犧牲者。」
「Michael Fung」亦都寸傻根出post前有無受藥物影響：「『國師』嘅說話，要智商130先睇得明。好似係。」■記者 陳庭佳