■疑為謠言的開端帖。港珠澳大橋爆出懷疑造假，雖屬個別事件，反對派為咗抹黑，當然乘機造謠。有人昨日在fb上載一張在飛機上向下拍攝大橋的照片，照片中的大橋顯得「彎彎曲曲」。各激進反對派就瘋狂轉發有關圖片，質疑大橋係「豆腐渣」云云，「新民主同盟」前立法會議員范國威當然唔執輸，share埋一份仲要發帖唱衰。不過，有網民篤爆，話條橋顯得彎彎曲曲其實只係因為隔住玻璃影同埋受引擎氣流影響。結果，唔通你叫呢啲政客自己認錯呀，梗係刪post當冇事啦！
飛機氣流影響 航拍大橋顯「扭曲」
該幅引起激進反對派「異常興奮」、「證明」港珠澳大橋係「豆腐渣」嘅照片，疑係首先由迅智廣告有限公司創辦人兼創作總監「Yiu Koon Tung」上載至自己的fb，更發文稱：「本人早前目測『港豬澳』大橋結構安全∼」其後，激進反對派網民「Sky Walker」懷疑偷圖上載至自己的fb。
有關帖子在反對派之間瘋傳，網民當然紛紛借機鬧爆。「Timmy Lai」留言稱：「歪零歪稱，好似好兒戲。」「Bernice Lo」稱：「結果就係政府話冇問題預期開放行車！」「Kam Choy Thomas Chan」更詛咒「車毁人亡，全部將葬身大海中，死無全屍，偷工減料，豆腐渣橋，死得人多」云云。
范冷嘲熱諷出醜 被雙邪助理篤爆
正在找機會唱衰大橋建設的范國威當然如獲至寶，分別在自己的fb專頁、他營運的「政治咖哩飯」及和毛孟靜合作的「毛范本土」fb專頁等「分身」上轉發了「Sky Walker」的帖子，更留言稱：「大家有冇見過好似港珠澳大橋咁樣不同高度嘅跨海大橋？我見過，我真係見過。」
想不到，「仗義」走去澄清嗰個，竟然係「青症雙邪」Cheap禎（游蕙禎）嘅助理李宗澤。佢在自己fb發帖，稱「我知好想拆左（咗）佢但唔代表亂咁放料」，「手震or飛機引擎氣流搞到張相上面嘅野（嘢）彎彎曲曲唔代表真係咁喎......」他稱自己近月也多次高空目測「港豬澳」，並在留言區上載了自己拍攝的照片證明one人橋並無歪歪斜斜。
李宗澤更去原post「Yiu Koon Tung」的fb留言，「飛機引擎熱氣／玻璃都會影響到你影到條橋係波浪形，搞到某位飯前議員（范國威）都炒左（咗）車啦∼∼」「Yiu Koon Tung」死不認錯，回道：「閣下『目測』一張網上圖片竟可看得出熱氣對玻璃倒映造成的影像扭曲......果然係犀飛利∼」
網民指正錯誤 傳謠者刪帖當無事
李宗澤還擊道：「條橋呢幾個月我真係睇過唔少次，係咪去到波浪型（形）至少唔係啦，再者你坐嗰個位的確係引擎後方黎（嚟），熱氣的確係會影響到我地（哋）睇嘅影像。我都係咁樣去引證返姐（啫）！」網民「Raymond Ho」就做炸兩，指出：「（照片中）機翼彎到咁都估到咩事。」「Tango Chan」也說：「為咗做低對家，真係可以去到好盡。」
令謠言在網上熱炒，始作俑者當然有責任，但范國威身為前議員，為咗抽水連求證都唔求證一下，就幫手散播謠言，最後竟然係「獨派」去澄清，世間荒謬事真係莫此為甚。雖然范國威個fb即時刪帖，當冇事發生，但少年你太年輕，呢個世界係有cap圖呢回事嘅。
■香港文匯報記者 羅旦