■偉哥仰懶理信眾落難，不忘在fb發帖，發佈肉麻「獨照」，硬銷老友經營的眼鏡店。 fb截圖「本土民主前線」兩大「獨人」，「獨琦」（梁天琦）去周遊列國，咁偉哥仰（黃台仰）去咗邊？同「獨琦」相比，偉哥仰近日發親帖，都係刷吓存在感之類，對比涉嫌俾佢煽動，現在坐監或上緊法庭嗰班，好似好快活咁噃。
近日，佢幫佢老友間眼鏡店宣傳，要各方友好幫襯，咁「佢地（哋）先有資源投放返落『本土派』，擴大『本土派』收入」云云。
偉哥仰近日發帖，向自己友推薦同屬「本民青政狗」友好的Alfred Chow，在荃灣經營的「Focus Optical」匯澄眼鏡。佢當然將對方吹捧得又專業又咩咁，仲話幫襯對方就等於「支持本土青年創業，對抗財團壟斷」，之後仲話：「俾自己友賺好過益外人。俾自己友賺完，佢地（哋）先有資源投放返落『本土派』，擴大『本土派』收入。」
佢又不忘寸吓此前狂咬「本民青政狗」、平日都戴白框眼鏡的「前熱狗頭目」狗達（黃洋達），指該店「由乞人憎嘅白框到扮文青嘅膠框都一應具（俱）全」喎。
所謂鬼鬼祟祟偷番薯，偉哥仰呢排靜咗，但如果以為佢「獨心」已死就一定大錯特錯，最起碼一唔「獨」，肯定少咗大批金主繼續供養「獨琦」遊埠、偉哥仰繼續過悠閒生活。
其實，「本民前」之前籌咗幾多錢，用喺邊度都冇交代過，現在又話要錢，真係「願者上釣」囉！
■香港文匯報記者 羅旦