■容樂其在fb出帖大讚容海恩。容樂其fb截圖新民黨立法會議員容海恩不但熱心對待街坊，更以真誠融化反對派中人。社民連前副秘書長、輔仁媒體主編「熔癌」（容樂其）近日在其fb網頁上載一張他與容海恩的合照，大讚「同容海恩食過麥當勞就知佢真係出來撈」，不但讚容海恩「堅抽」，更同批評容海恩嘅人「開片」。
邀Like請食麥記化敵為友
「熔癌」此前在fb發帖，話上月17日容海恩在fb邀請他讚好，「呢啲人梗係要CAP圖公審啦。」點知容海恩真係留言回應，話大家都姓容，唔使咁計較。
大量口痕友紛紛殺入，質疑該邀請係真身定係fb管理員，又話佢塊面多雀斑，有人更問佢會唔會聚吓同埋派月餅等等。
點知容海恩又真係應要求直播整月餅，仲約埋「熔癌」同佢班友好去麥當勞。「熔癌」餐後話：「容議員去買雞翼俾（畀）我，仲問我（要）全翼/全槌，好細心......」
之後，佢又寫咗篇文大讚對方同網民真誠互動，話佢成功當選議員並非僥倖：「當有人笑佢（容海恩）多雀斑，佢問番（返）嗰個人介紹啲嘢來搽面；當有人笑佢只係識派月餅俾（畀）阿婆，佢就親手整足二十個派俾（畀）你班口痕友。」
他續道：「當我介紹其中一位同事姓藍係原居民，佢即刻講到沙田排頭村，唔洗（使）諗就UP（噏）得出兩個名（我當然係唔記得），然後藍生話兩位藍生都係住佢隔離（籬）；當我再講佢係會搞打機比賽，佢就即場拿出手機同佢玩番（返）場，仲要扮輸（好似係）。當有出席者拿住兩封請願信突襲，佢從容不迫接完即場拆。」
網民「Peter Yip」留言道：「由容議員親自覆我cm嗰下開始我對佢認真改觀。」「Leong Ting Lui 」就話：「 你哋搵friend定議員？」
「Alexander Yeung」亦出來講「公道說話」：「 唔係friend唔friend嘅問題，議員本來就唔係高高在上嘅人，而係同大家同呼同吸嘅人，由佢親自覆其實係有意思嘅。」
不過，都有啲人唔係咁諗。「Leong Ting Lui」稱：「保險經紀R（搲）關係你比（畀）份生意佢都可以講雙贏，容海恩R（搲）咗你張選票就投『一地兩檢』、開放『大陸醫生』來港執業。 跟住有條友話佢咁樣冇位（無謂）寫衰佢，擺明隱惡揚善同CCTVB 一×樣。」
「熔癌」就反唇相譏：「『一地兩檢』我ok呀，而（??）家得『飯民』扮反對咋嘛，佢地（哋）知道反對唔到都要扮大聲有做嘢咁囉。」想不到容海恩就留言回應：「咁遲的（啲）（高鐵）開通左（咗）攪（搞）番（返）個高鐵團喇，我帶隊。」「熔癌」積極回應：「拿（攞）番（返）張回鄉卡先！」
當然，容樂其並唔係咩「堅貞」反對派，佢自己都一直自認係「生意人」，更公開貼文話：「唔好同我講乜×野（嘢）仁義道德，有利益我就乜都得。」
不過，呢次「事件」睇到互動係幾咁重要。■香港文匯報記者 鄭治祖