■鄺俊宇扮老友搭老闆膊頭。 fb截圖叫網民「廣傳」害食肆關兩日 事件澄清後辯稱「協助查證」
反對派成日鬧人「語言偽術」，但其實佢哋先係語言偽術嘅高手高手高高手，而鴿黨（民主黨）嘅鄺俊宇（鄺神）就做咗個出乎常人羞恥心嘅示範。話說身為元朗區議員嘅鄺俊宇上星期五加入流言行列，老屈元朗一間食肆賣狗肉，仲叫網民「廣傳」加幫手「搜證」，害到人哋雞毛鴨血，關門兩日。事後發現「狗肉案」純屬虛構，鄺俊宇潛完一輪水噚日終於去咗善後，喺facebook刪咗篇靠害文，再出返篇文去「澄清」，擺張同老闆搭晒膊頭扮老友嘅相，但就一句對唔住都冇，仲寫到自己係「協助查証（證）真偽」添，唔知頭唔知路仲以為鄺俊宇一直幫緊個老闆啊。唔少網民都好「敬佩」佢嘅「語言偽術」，有人仲留言話︰「掂呀！鄺議員！你真係完全將一個人渣無賴角色發揮得淋漓盡致！」 ■香港文匯報記者 甘瑜
上回講到，鄺俊宇未經查證，就喺fb出文，老屈一間賣羊肉煲嘅元朗食肆賣狗肉，話自己「搜証（證）中」、「已去信警方促調查」、「請各位協助廣傳訊息」。唔少網民市民加入鬧爆間無辜食肆，老闆仲因此徹夜難眠關門兩日，而事後發現其實純屬虛構之後，鄺俊宇就一直深潛到不見人影，道歉都冇句，篇靠害文仲掛咗喺fb兩日有多。
群情洶湧 終刪文打倒自己
唔知係咪見到群情洶湧，太多人叫佢出嚟交代，鄺俊宇噚日終於刪咗篇靠害文，再去間食肆度食飯打卡，出個新post，完全打倒大前日嘅自己。一開始，佢就親切稱呼個老闆做「幹哥」，仲話自己係被要求「協助跟進『疑似劏狗曙U』事件」，仲聲言老闆「沒有介意」，覺得大家只係「熱心」咋喎。佢仲借老闆把口話「幸好今次有議員協助查証（證）真偽」，而佢自己就會繼續「跟進」。
對於鄺俊宇將自己被告講到係原告咁，唔少網民都覺得「歎為觀止」。「Ricky Yuen」就話︰「初初未查就叫人廣傳未審先判，依（𠵱）家扮冇事扮好人，你真利（厲）害。」「Gary Kwok」亦表示︰「掂呀！鄺議員！你真係完全將一個人渣無賴角色發揮得淋漓盡致！」
有人就質疑，老闆其實根本唔知鄺俊宇點樣害佢。「Ken Lee」就問鄺俊宇︰「有無比（畀）你之前delete（刪除）嗰段野（嘢）老細睇？」「Tang Fu Wing」就話︰「如果幹哥知道上星期五係鄺神叫網民廣傳，可能未必同佢拍膊頭影相。」
屈完人竟一句道歉都冇
不過，大家最嬲都係鄺俊宇講到事不關已，老屈完人一句對唔住都冇。明顯係鄺俊宇支持者嘅「Alison Chung」都忍唔住批評︰「我對呢個post有點反感。 雖然欣賞你地（哋）勇於面對受害人。不過幹哥有要求你地（哋）查真偽咩？！你地（哋）之前個post比（畀）人感覺係未審先判。希望你地（哋）既（嘅）職員日後做多點功夫去確認後先出post，一個post可以引起好大後果。昨（作）為當區年輕有幹勁既（嘅）區議員及立法會議員，真的希望你地（哋）日後能做好點，謙卑點有錯就去認，比（畀）選民留下好的印象吧！」
「吳俊雄」就看透世事話，反對派成日話政府有錯唔認，但其實政府都會向公眾道歉，「 點不知鄺已完唱衰完人去人地（哋）間鋪（舖）食餐cheap（便宜）飯就當無事，成篇野（嘢）一d（啲）歉意都無，難為老闆仲要笑住比（畀）你影post上來......一啖砂糖一啖屎......勁無恥！！」「Lee Kin Ho」就話︰「一隻羊就幫到大家明辨好壞，下次選舉大家自行決定囉......」
網民鬧爆鄺俊宇
Joe Lam︰鄺議員，寫一大篇野（嘢），你都無同幹哥講句唔好意思，別忘記你都有份誤會佢同放上FB，你唔好當自己無份。
Ricky Yuen︰初初未查就叫人廣傳未審先判，依（𠵱）家扮冇事扮好人，你真利（厲）害。
MiuTing Chan︰點解無道歉？刪除之前抽水post，掩飾過錯，現在懶有正義為店主澄清，這是什麼手段？！卑鄙下流！
Ken Lee︰打完人一鑊，再同人食餐，真有你的。有無比（畀）你之前delete（刪除）嗰段野（嘢）老細睇？
Tang Fu Wing︰如果幹哥知道上星期五係鄺神叫網民廣傳，可能未必同佢拍膊頭影相。
Gary Kwok︰掂呀！鄺議員！你真係完全將一個人渣無賴角色發揮得淋漓盡致！
Fayan Yu︰你條宅男議員，風吹邊面就向邊面擺尾，真羊/狗都不如。
Lee Kin Ho︰一隻羊就幫到大家明辨好壞，下次選舉大家自行決定囉......
資料來源︰鄺俊宇fb留言
整理︰香港文匯報記者 甘瑜