明年3月立法會補選，「香港眾志」（中箭）諗住永續佢哋喺港島嘅議席，但邊個去馬大家都仲係估估吓，一時話係常委周庭，一時又話係被DQ（取消議員資格）嘅羅三七（羅冠聰）女友、同樣係「中箭」成員嘅袁嘉蔚，佢仲俾人形容係「代夫出征」添。不過，當事人日前喺台灣一個對談會上就振「婦」綱，話唔鍾意「代夫出征」呢個講法，仲因為有報道標佢做「羅冠聰女友」而省咗個記者一鑊！雖然佢有佢咁講，但網民一於睬佢都傻，寸「中箭」想玩家族政治，又覺得佢知名度、辯才同往績欠奉，「𠵱家真係係人都選得。」 ■香港文匯報記者 陳庭佳
袁嘉蔚日前去咗台灣出席一個香港女性參與政治嘅對談會。根據對談會嘅文字記錄，袁嘉蔚話自從三七入咗冊之後，佢做咗好多訪問同演講，但無論主題係乜嘢，焦點都係佢嘅「羅冠聰女友」身份，「有次有個記者問我『香港眾志』未來方向，因為其他人都入獄了，我回答之後，再看訪問，他的文章，我的身份也只是羅冠聰女友。我很憤怒，我跟那個記者說，我接這個訪問的身份是『香港眾志』的成員，不是羅冠聰女友，最後他有改了。」
佢又唔鍾意啲人講佢「代夫出征」，「好像他（三七）出來我就要退場，在他假釋的當天，進法院前，我在媒體前對媒體說我的感受。他假釋出來了，我就突然退後了，成為聯絡員。」佢對外界覺得佢係代替品感到難受，因為佢唔係一個素人，亦都有自己擅長嘅地方，希望未來可以塑造到比較獨立嘅身份，令公眾認為佢係有能力嘅女生，而唔係依附喺男友身邊嘅小女友喎。
AQ差 自言三七入冊瀕崩潰
三七保釋之前坐咗兩個月，袁嘉蔚就話自己每日都瀕臨崩潰，對於好多人嘅問候都覺得唔耐煩，「很多人會走過來，每天起碼十個，來問我，『你好嗎？適應沒有？』在我心裡我都想說，『廢話，怎麼會好啊。』我知道那些問候是善意的，我也很感謝，但每次的問候都是每次的傷害。」
三七就話有得保釋啫，但衝擊立法會嗰13個人又唔係政治明星，邊會有咁嘅待遇？其中「中箭」常委林朗彥同社工梁曉暘，仲要喺入面面對情海翻波！同場嘅林朗彥女友、「中箭」成員黃莉莉話，男方入冊兩星期之後，雙方曾經分過手，當時佢試過箍煲，但??家覺得即使唔可以喺返埋一齊都無問題，因為仲係非常親密嘅戰友喎。
梁曉暘女友、前理大學生會外務副會長黃沅羚更自爆已經分咗手，「在他入獄後，我在幫他處理所有東西的過程中，我發現一些事情吧，是不可以公開的」，如果公開驚畀人當佢係衰人咁話。
赴台振「婦」綱 願「走得更前」
除咗喺台灣振「婦」綱之外，袁嘉蔚亦都接受咗香港報章訪問，重申唔鍾意人哋話佢「代夫出征」，「如果有一天我願意走得更前的時候，都是因為我自己」，又話「中箭」唔想喺補選複製一個三七出嚟，但就死都唔肯透露人選同埋內部遴選機制。「Ka Chun Yu Bryan」諷刺道「??家真係係人都選得」，「Chris Chan」就覺得「搵個低少少嘅代表，咪一定聽話無偏差。」
