■播「獨」組織在中學外安插違法宣傳品。 香港文匯報記者彭子文 攝一直播「獨」的「本土民主前線」發言人獨琦（梁天琦），又話「時代革命」又話不惜流血又話盛，叫人去死然後自己一句話怯就持續潛水，只係被招待去「周遊列國」先上水蒲吓頭，俾人恥笑係縮頭龜。不過，喺外部勢力支持下，播「獨」所得嘅利益實在大，佢當然唔會放棄。近日，一套講獨琦嘅電影面世，話要講一個「迷惘青春嘅故事」，結果當然係漂白獨琦，話佢係「普通人」啫，叫完人衝自己縮埋走數都係好理所當然咁話。
香港大學前學生會會長馮敬恩睇完套片之後仲話，獨琦係「摩西」喎，真係人唔笑狗都吠啦大佬！
以獨琦為主角的電影《地厚天高》，導演林子穎曾經拍過美化違法「佔中」馮敬恩等參加者的《未竟之路》。昨晚，套片搞咗個首映，成班「明獨」、「暗獨」聚首一堂，包括近日獲保釋外出嘅「香港眾志」主席羅冠聰，「叫人衝、自己鬆」而被恥笑的「青年新政」梁頌恆等等一齊圍爐取煖。
話龜縮係因為港人「期望高」
馮敬恩喺睇完呢套片之後，就喺網誌寫咗篇《人民需要摩西，摩西不需要人民》，其中竟將獨琦比作摩西，話「摩西是一位領袖，帶領受到埃及人壓迫的以色列人出埃及。可是在過程中，人民曾經離棄摩西，摩西自己又因為面對困難，信心動搖，最終眺望迦南地之後就死去，什麼都沒有得到」。
佢繼續話，「人民心裡確切需要英雄、領袖帶領，卻期望這位『英雄』真的是『英雄』，......這種責任感與港人主觀的投射，令梁天琦很痛苦，......『英雄』有時候為了不可以 Let people down ，不可令人民失望，或者是為了黨，為了字頭和陣營，就會身不由己，慢慢失去自我。......只希望不會再有如梁天琦般年輕有為的年輕人，成為社會製造出來的英雄和受害者」云云。
成篇文其實就係話，獨琦係「英雄」，臨陣退縮都係俾你班人「害」嘅。咁，當初係邊個叫人衝，邊個搞出旺角暴亂，令唔少人坐監，然後佢自己就四處逍遙？俾人鬧就話自己係普通人，話係你對佢期望過高，「迫死人」喎！Come on,James，咁樣漂白法，你以為香港人真係「港豬」，竟然會信咩？
■香港文匯報記者 羅旦