林 作
聖誕節就啱啱過咗，各位男士剛剛搞掂咗畀另一半嘅聖誕禮物，但係應該又要開始頭痕嚟緊嘅情人節送咩好。當然，前提係首先你要有......不過，即使你仍然係單身貴族，為媽媽家姐甚至女同事喺冬日添上一份心意亦不失為一個好主意。
問題嚟啦﹗就算我真係想扮暖男送份禮物畀女朋友，又或者要討好暗戀咗好耐嘅女神，究竟要送乜好呢？買衫？買大咗嘅話�哋覺得你話緊佢肥。買珠寶？係幾好嘅但係你開壞咗個頭呀師兄﹗以後買唔返同等嘅嘢人哋就覺得你變孤寒咗。手袋？千祈唔好﹗十萬個女人有十萬種口味，尤其係𠵱家LV、GUCCI喺市面上氾濫已經變到好俗氣，你都係等你BB睇啱先再去碌卡。性感內衣褲？Well，男人梗係鍾意，但係相對上保守嘅香港女性可能會認為搞Cheap咗�哋而畀紅牌你。再者，一個唔好彩搞錯咗送咗畀姨媽嘅話你都可以準備去朝鮮勞改。
咁一個聰明嘅男士應該點做？𠵱家呢個世代乜都講要度身訂做、獨一無二或者DIY。有心思啲嘅，親手整蛋糕或者上網學下點樣整彩虹玫瑰，保證你女神或者女伴冧爆。嫌麻煩嘅，上網訂做有名字刻喺上面嘅首飾或者裝飾，亦不失為一個好嘅選擇。如果送畀女同事嘅話，一張得體嘅賀卡加上幾行有心思嘅字句（可能係關於某啲曾經發生喺你哋之間嘅有趣事情），絕對可以顯出你嘅Taste而唔會感覺突兀，隨時係一段感情萌芽嘅契機。至於屋企人，應該比較着重喺實用性方面，例如話係郵輪或者海洋公園之類嘅套票，平啲嘅話可以選擇酒店嘅自助餐，請屋企人大擦一餐。
老實講，好多收咗嘅禮物其實幾個月後你就會完全唔記得咗�嘅存在。為環保為實際都好，送嘢畀啲你關心嘅人其實最緊要嘅都係搵啲可以Fit Into佢生活嘅物件。如果有啲幸運嘅男士同時有一位以上嘅女伴的話，畀你哋一個溫馨提示︰記得買同一款嘅禮物送畀你嘅女伴們，否則他日一時記錯嘅話準備俾人大刑侍候啦！