梁振輝 香港資深出版人
婷婷與輝仔已拍拖7年。為免好事多磨，出現「七年之癢1」，二人決定今年年底「拉埋天窗2」。今天，雙方家長相約在某酒樓商談婚嫁事宜。
女方父：真開心，我哋就嚟做埋「老襯」囉噃！
男方母：婷婷賢良淑德，我哋輝仔可以娶到你個女就真係三生有幸、家山發/家山有福嘞！
女方母：唔係話我自己讚自己個女，婷婷讀飽詩書，又係專業人士，都不知幾多人追；不過輝仔都唔輸蝕，咁後生就有自己嘅事業！
女方父：我就話，乜都假，至緊要係對我哋個婷婷好！我哋都係望佢下半世安安樂樂啫！
輝仔：未來外父，我肯定「錫到佢燶3」啫！
婷婷：咁肯定，聽住先喇！
男方母：言歸正傳，「禮金」方面，我哋諗住畀九萬九，長長久久，攞個好意頭喇！
女方父：唔係呀嘛，有冇考慮到通脹㗎，而家喺酒店度擺一圍酒都「閒閒地4」萬幾兩萬銀喇！
女方母：我哋啲親戚朋友都至少十零廿萬，「禮金」得咁多多，「買薑唔辣、買醋唔酸5」囉；攞個好意頭，不如六十八萬八，路發發，咪仲好！
男方父：下，賣女呀？
女方母：喂，未來老爺，講說話好聽啲噃，我只係打個譬喻啫！你睇我哋養大個女都「揼咗唔少本6」，仲有我哋啲「嫁妝」都唔會少得去邊嘅！
男方父：講「嫁妝」呀，你哋預咗㗎喇！
男方母：講開又講，我哋鄉下興啲「嫁妝」有大床、樟木槓、龍鳳鈪，仲有......
女方父：咁即係「搵老襯」啫！
隨後雙方家長就「禮金」和「嫁妝」的質量作出激烈辯論，氣氛顯得十分緊張。
婷婷：嘩嘩嘩，咁拗落去，親家都變冤家喇！
輝仔：結婚係我哋兩個人嘅事，你哋咁會搞到我冇得「做老襯」個噃！既然條數傾唔掂，不如「親家兩免7」，喺啲「群組」度發放婚訊就算罷嘞！舊時啲人冇錢都係登段結婚啟事就算㗎嚹！
婷婷：係喇，慳水慳力！慳慳埋埋都應該夠我哋包個攝影師去加勒比海搵個小島影婚紗相囉！
輝仔：婷婷你係咪「諗多咗8」啲呢？唔使留番啲錢做首期呀！仲有第日個B啲教育基金哩！
兩家人的兒女結婚，男女家的父母彼此對稱「親家」，當中的「親」讀「襯（can3）」，無怪廣東人叫「親家」做「老襯」。
「嫁妝」是女子出嫁時帶到夫家的錢財和物品。理論上，女家的「嫁妝」與男家的「禮金」應等量齊觀，但實際上有很大機會存在着相當差距--「嫁妝」的價值遠超於「禮金」。這是由於「嫁妝」的質量可視為身份與財富的象徵，女家一般都樂意付上可觀的「嫁妝」。其實質量高的「嫁妝」有着另一個重要的意義--避免其女兒受男家輕視，也可促使男家上下善待其女兒。為此，女家「蝕底」（吃虧）幾乎是必然的事。這個世界有人「蝕底」就有人「着數」（獲益），此情況「着數」的自然是男家了。正常情況下，這種「着數」非男家主動提出，可世人大多將之界定為「男家找女家着數」，廣東人就用上「搵老襯」這個類似「搵笨/搵丁/搵着數」的俗語來形容去佔人家便宜的人，而「老襯」便順理成章地指容易被騙的人。
傳統上，「親家」的關係並非對等，於是人們會叫男家做「上門親家」，女家做「下門親家」。顧名思義，兩家有上下之分--上主導，下依循，現實生活中也不乏此等不平等關係與情況，如：供應商（下門親家）與超級市場（上門親家），供應商須接受超級市場訂定的苛刻上架條款；男方（下門親家）追求女方（上門親家），男方須取悅及遷就女方，以期取得其芳心。
有「準新郎」會自我或被揶揄為「老襯」，那當新郎/結婚就是「做老襯」。以下言論或許可對「應否『做老襯』」這課題提供一點啟示：
「成個老襯，從此被困」（《婚禮進行曲》）
「婚姻是金漆的鳥籠，又是被圍困的城堡，外面的人想衝進去，裡面的人想逃出來。」（《圍城》錢鍾書）
Love is a flower that lives on the cliff. You can pick up the flower with nothing but your courage and adventurousness.（William Shakespeare）
【愛情是一朵生長於懸崖上的花，採摘它你必須有勇氣和冒險精神。（莎士比亞）】愛情可借喻婚姻。
________________________
1、《七年之癢》（The Seven Year Itch）是一部於1955年上演的美國喜劇，主角是一代性感尤物瑪麗蓮夢露（Marilyn Monroe）。片中講述一個剛結婚七年的男人在太太攜子外遊時另結新歡的故事。及後人們借此片名來形容那些有非分之想的丈夫或有越軌念頭的親密男友。
2、有謂「打開天窗說亮話」，所以筆者相信「拉埋天窗」就是說「暗話」--閨房中的私語。試想二人如未成親（指舊時），哪會有這種行為呢？「拉埋天窗」於是成了結婚的代詞。
3、「錫到佢燶」指對她極度疼愛，「燶」讀「農4-1」。
4、「閒閒地」，讀「haan4 haan4 dei6-2」，當中的「閒」有等閒、隨便之意；這裡指「隨隨便便地」，也形容不費勁兒即可達到某個水平。
5、「買薑唔辣、買醋唔酸」指從某人或單位所獲得的資金對某事的完成起不了多大作用。
6、「揼」，粵方言用字，讀「dam2」；「揼咗唔少本」，指投放了不少資本；「揼本」，亦作「落本」，書面語是「下本錢」。
7、「親家兩免」指雙方免除了一些繁文縟節。
8、「諗多咗」指想多了或想得美。
【專欄簡體版】https://leoleung2016.wordpress.com/