■王祖安指要發展一間新公司，最重要是結合概念、人才和資金。 香港文匯報記者劉國權 攝好勝瘋狂工作 奮鬥永不停步
人生格言何其多，但水過鴨背了無痕，真正會付諸實行的人又有多少？頭頂大新銀行王守業次子「光環」的王祖安，大學畢業後未有返回家族幫手，反而一直待在美國任職基金經理。努力磨劍十年，賺到第一桶金後，他在2006年回流創業，主力投資業務，至今營運十多年，實力愈積愈厚，最新斥資近30億元在英國買入一幢商廈。亞馬遜創辦人Jeff Bezos曾講過，企業要永遠當「Day One Company」，王笑說：「我希望（自己）到80歲都會咁諗。」 ■香港文匯報記者 顏倫樂
王祖安年紀不大，今年才44歲，正值男人最黃金的年齡。訪問當日他表現穩重大方，絲毫不見世俗眼光中紈絝子弟的驕氣。「我畢業後在美國金融界做咗十年基金經理，嗰陣好多時每日只瞓4個鐘，飲4杯大裝咖啡，然後就瘋狂工作。因為我鍾意贏，總之你做投資就係希望你嘅判斷啱，啱你就賺錢。無嘢係天跌落嚟。」或許正正因為好勝，令王祖安比常人更為努力。
要成功和生存 必須變得頑強
「嗰陣每朝6點幾返工，同公司一個事業已好成功嘅男士，幾乎朝朝早我坐喺度，佢就已經坐喺附近。佢係一個猶太籍嘅美國人，嗰陣問佢成功秘訣，佢答我『要成功和生存，你必須成為一個非常頑強的人』，所以我哋公司都改名叫『Tenacity（頑強）』。呢句說話係除咗爸爸教我嘅嘢之外，最影響我嘅一句說話。」
於美國賺到第一桶金後，2006年王祖安在香港獨力創立Tenacity，坦言創業初期很辛苦，「一年內香港美國飛咗廿幾次」。當年看好澳門開放賭業後會蓬勃發展，於是與一個美國基金合作斥資近5億元在當地購入一個商業項目。
做生意三重點 人緣機遇金錢
項目位處新馬路39號，在澳門郵政總局對面，地點一流，類似香港太子大廈的位置。項目包括7萬方呎商場和18萬方呎辦公室，但因為建築問題令客流稀疏，出租率僅14%。「嗰陣我哋買，個個覺得我哋黐線，因為個價唔平。買入後我全幢翻新，將商場個門口搬去最靚嘅角位吸引返啲人。」不過好景不常，他續說：「我哋裝修好嗰日，正正就係2008年9月雷曼兄弟爆煲嗰日，但我同我條Team（團隊）講，要有信心，我哋嘅產品有優勢，咩風雨都會過到。」
項目後來出租率升至98%，2011年出售予永光集團及相關人士，賺幅以倍計。「其實我做生意嘅理念有三個重點，由我阿爺傳落，投資最緊要有人緣、機遇、金錢。」至於什麼東西值得投資：「一係要超平，一係地點超好，一係就個產品有特別優勝嘅地方。」
世界不停轉變 不為自己設限
王祖安表示，現時房地產業務佔公司投資比例約一半，其他業務包括內地的TMT Sector（數碼新媒體），以及投資不同的股票基金、債券市場和外匯等，香港亦有小量物業投資。「我無限自己只做房地產或股票，因為世界不停轉變，香港人精神就係包容咁去面對不同嘅演變。」
「其實亞馬遜創辦人Jeff Bezos講過一句有意思嘅說話，佢話亞馬遜係一間Day One Company，呢樣好值得學習，因為當你認為你間公司係Day Two時，你已經玩完。」他笑說：「我𠵱家有個仲讀緊書嘅小朋友，又要照顧公司呢個「Day One 小朋友」，24小時On-Call，樣樣嘢都緊張，每日都係瞓5個鐘至6個鐘。不過我有一班好同事，我32歲返嚟創業，佢哋多數老過我，有啲跟咗我好多年，希望大家一齊奮鬥落去。識睇人，搵啱人好緊要。」