■左右圖：區諾軒加把嘴挑釁引發網上口水戰。網上截圖做立法會議員可以有自己的堅持，但亦應當有包容不同意見的心胸。要求反對派中人有此質素無疑係緣木求魚，但好似區諾軒咁小器過「方丈」嘅就真係罕見。區諾軒冷手執個熱煎堆，俾「眾志」欽點「代女」參選後，扮晒好民主好開明咁，但有唔少見過佢副真正嘴臉嘅KOL，近日就紛紛回帶，叫大家認清楚呢個人有幾咁小器，人格幾咁低下。
原名葉鍵濠的商業電台節目主持健吾近排出咗幾個posts，回帶去年同區諾軒嘅私人恩怨：話說舊年10月，健吾出咗post笑工黨東區區議員麥德正掛嘅反「一地兩檢」橫額，唔及建制派掛嘅關注急症室加價：「同樣係banner，而（𠵱）家嘅人，會在乎邊張？法治定係急症室加價？......哈哈。點解香港反對派會輸，其實係（喺）呢啲細眉細眼位就睇到。」
麥德正喺公海回應唔奇吖，但估唔到區諾軒會加把嘴，更加語帶挑釁：「健×，憑咩講咩反對派輸姐（啫）。......做媒體人做到你周街得罪人，番（返）去玩單機啦。發神經。」
嘩，你睇吓區諾軒副嘴臉，當然引起網上口水戰啦，包括由健吾自己、「得罪講句」，及中大講師劉正經營嘅「無神論者的巴別塔」fb專頁都鬧爆區諾軒，區諾軒就好囂咁反擊：「回應我你就光明正大啦，走去用個匿名page，做咩姐（啫）你。......做電台主持做到你咁偷偷摸摸，健吾！」
被嘲「小器 無實力 不知大勢」
健吾就喺近日出嘅post講返呢單恩怨，話：「如果那個人本身小器，無實力，也不知大勢，就會覺得，媒體人『得罪人』是有問題的。......做政客，最忌無端端對有節有理的人說『發神經』。因為這三隻字，可以原原本本像鏡子反映一樣，反彈到他身上。港島區再出周庭水着，最後彈出黎（嚟），係會周圍話媒體人發神經的政工作者。港島區選民，我真係恭喜你呀。」
回帶再回帶，網民「Kian Lee」在另一專頁就借機講另一宗恩怨：「區諾軒教人搞媒體，咁有無人教佢上網唔好亂講嘢？」原來，2015年區議會選舉時，民主黨「乳鴿」的ＷhatsApp群組的對話外洩，被揭發當時還是民主黨員的區諾軒，不但笑「青年新政」，在談到對方在旺角砵蘭街派選舉單張時，更嘲弄對方是在「派發免費一樓一指南」。
「香港焦土力量」也回帶了該段「歷史」：「我就乜都唔知，淨係記得個（嗰）陣區諾軒見青年新政選九龍西，就係咁笑×人地（哋）輸硬，仲建議游蕙禎企街派叫雞指南先有機會贏咁喎。佢咁貼地，咁關心香港色情事業，好人好事，一定要大力宣揚。」
隱瞞「激」歷史 參選後扮「乖仔」
區諾軒以前咁「激」，但一報名參選就扮「乖仔」，唔敢講自己一直鼓吹包括「港獨」在內的「自決」，燒過基本法又一度唔肯認，試圖扮「改過」，信唔信得過，相信大家都會自行判斷嘅！
■香港文匯報記者 羅旦