■冇諗到一句話令「販民」全現形嗎？佢哋堆粉絲更估唔到囉！驚喜崩潰一齊嚟，恭喜晒！民建聯fb圖片反對派大大聲聲話唔畀講「結束一黨專政」係「收窄言論自由」，仲表現到一副以後要繼續挑機咁嘅樣，但事實係佢哋自己都覺得講完會瀨嘢。一眾反對派議員前日口響響話要喺見記者時高呼「結束一黨專政」，大家你眼望我眼終於等到「民主派會議」召集人莫乃光講話「我諗唔需要」，然後就一齊縮沙，突然咁團結一致嘅場面都咪話唔壯觀。唔少網民都揶揄佢哋係「戲子」，仲寸粒聲唔出嘅咖喱飯（范國威）「啱啱先有飯開，唔好阻我返工」。民建聯東區支部個facebook都出圖笑佢哋︰「團結為飯碗。」
街工立法會議員梁耀忠前日喺見記者嘅咪兜前，叫一眾反對派議員不如一陣向住鏡頭嗌返句「結束一黨專政」，去做個表態咁話。眾目睽睽一個炸彈掉埋嚟，唔少反對派議員都唔知接唔接好。除咗區諾軒爽快話「ok呀無問題」之外，毛婆（毛孟靜）就一直問人哋介唔介意，企正前面嘅咖喱飯粒聲唔出，縮喺後面嘅公民黨黨魁戇橋（楊岳橋）亦無反對。
直播全程扭擰 網民：不如總辭
等到鴿黨主席胡志偉到場，大家又再問一次，點知胡志偉都話「我梗係唔介意啦」，毛婆就話「得」，唔出聲嘅就繼續唔出聲，終於等到莫乃光出現，咖喱飯就同佢同楊岳橋低聲討論，莫乃光講咗句「我諗唔需要」。區諾軒再一次爽快話「好吖，唔緊要。」毛婆亦稱「有人反對就唔滯」，結果就變咗集體縮沙，但成個扭擰過程已經網上直播晒嘞。
見到班人咁樣，電台節目主持人「健吾」就轉截有關消息揶揄︰「好呀。大和解。」唔少人都紛紛留言恥笑。「Wing Yip」就話︰「啱啱先有飯開，唔好阻我返工。」「Yan Ho Wong」亦表示︰「總辭都唔制（濟）點會願意叫呢啲？」「Vincent Wai Kit Man」譏諷︰「抵死啦......玩嘢吖嗱......正一小學雞。」「Karson Sikto」道破︰「大家都係夾埋做一台戲，好戲子。」
「Willie Yau」批評咖喱飯︰「咖哩（喱）不嬲係×街，今日至知？」「健吾」講返句公道說話︰「扮咩？咖哩（喱）唔嗌佢地唔嗌得？」
方姨：含淚投票 民記：真向錢看
最搞笑嘅，係落選新東議席嘅方國珊都去咗留言︰「含淚投票的後果！」再加上「堅龜縮頭盔友」、「議席到手拍拍籮柚」、「抗專權抗到那（哪）??」嘅標籤，真係太平洋都俾佢抽乾。
民建聯東區支部都出咗張圖去恥笑呢班反對派議員，形容佢哋「團結為飯碗」，再加上「梁耀忠咁大整蠱」、「錢錢錢錢錢錢錢錢」、「參選向錢看」、「為民得個講」。
反對派咁樣出醜法，支持者當然深深不忿，但又要為呢班人開脫，最終竟然推咗梁耀忠做鬼。「Ze Ro Lee」就質疑︰「叫左（咗）既（嘅）話比（俾）人秋後算賬喎，打死都唔叫啦！錢無左（咗）都算，最終無哂（晒）幫市民出聲既（嘅）議員。......梁耀宗係咪臥底黎（嚟）架（㗎）？」
「Vincent Kwok」亦話︰「 平時一d（啲）都唔激嘅白頭佬（梁耀忠）無啦啦提議呢d（啲）？引左（咗）新當選兩條友嗌又比（俾）人DQ ！」
粉絲集體崩潰 「唔放過梁耀忠」
「Abm Chan」怒問︰「梁耀忠，你累『泛民』還不夠嗎？當日你原可做立法會主席而不做，但你故意將位置讓給梁君彥，然後DQ『泛民』議員，繼而修改議事規則，形成今日的局面，大家已放過你一次。現在你又鼓動全體『泛民』議員一齊嗌『結束一黨專政』口號，後果你當然很清楚，你居心何在？若你冇合理解釋，大家都釘着，不會放過你！」
呢啲咪就係「泛民邏輯」囉，學網民「林安邦」話齋︰「『泛民』係笑話吾（唔）係今日先知。」 ■香港文匯報記者 甘瑜