未了解真相就亂咁批評人抽政治水，務求搞大件事先，可算係反對派政客嘅慣技。網上近日流傳一張保安員雨天手指指趕走狗狗嘅相，網絡花生友自然大鬧特鬧，話佢不近人情。工黨同「新民主同盟」見「機不可失」，走去個保安員所屬公司抗議。不過，有片有真相，根據完整視頻顯示，該名保安員只係將隻狗趕離行車通道，反而係有個女人引隻狗出去淋雨噃！唔搞清楚真相就去人老闆度抗議示威，呢啲政黨有冇諗過分分鐘令到個保安員冇咗份工？冇，因為佢哋只係諗到自己！
話說嗰張手指指趕狗相在網絡瘋傳，唔少花生友鬧個保安員，有人就認出該處係位於荃灣嘅嘉達環球中心。工黨社區幹事趙恩來，同「新民主同盟」區議員譚凱邦見「群情洶湧」，即刻齊齊去該處示威抽水，矛頭直指該中心的管理中心，話人哋管理文化「官僚」，叫人制訂動物友善政策。譚凱邦仲喺自己fb踩個保安員一腳，話「落雨期間趕走狗狗，是不太有同理心」云云。
疑拍片者友人引狗淋雨
不過，做人真係唔應該看圖作文。所謂「有片有真相」，將幅圖上載上網嘅始作俑者，原來仲上載咗成條片還原過程。
片中見到，狗狗係走向車道、靠近正在該處上落貨的貨車，保安員行過去冇呼喝更冇郁手郁腳，只係手指指揮揮手咁趕佢走，當狗狗行開少少、離開咗車道但繼續停留喺中心有瓦遮頭的地方，個保安員已轉身離開、不再理會。反而懷疑係拍片者個女友人，引隻狗走咗出去中心範圍淋雨。
大批睇咗片嘅網民批評其他人唔應該單憑一張相就網絡公審個保安員。「Zeo Cheung」道：「個保安都係指開叫佢企埋一邊，都冇叫佢行出去。」「Kurbie Lam」說：「睇返條片頭10秒，嗰度係停車場啲車既（嘅）出入位，地下有車轆痕跡，即係啲車係經嗰度駛出來再停係（喺）片中架（㗎）GoGo Van嗰度，隻狗停係（喺）車路度都好危險，個保安都係指示狗仔離開姐（啫）......」
唔少人更批評明明係拍片者個女友人引隻狗出去淋雨。「Rilak Yuuri」說：「保安只係將狗狗趕離主要車輛出入口通道，佢一離開通道個保安就無理佢，反而拍片條友影住狗狗走又唔幫，佢條女仲引左（咗）狗狗出去淋雨，跟手再放相放片公審保安，呢啲咪係『人性光輝』囉！」
工黨同「新民主同盟」走去抽水，當然令好多網民同樣反感。「Kenny Li」批評：「班食飽飯泛民即時抽水，就算位保安可以保住份工，以後日子都好難過！請問各大愛L準備好夾錢養起保安一家未？」
「Wing Ng」嘆道：「重（仲）要係工黨，個保安真係多得佢唔少！」
「Ken Chan」就揶揄：「個（嗰）班政棍見個個都指責緊個保安，仲唔拿拿淋（臨）衝出黎（嚟）加一棍咩！」
■香港文匯報記者 陳川