■黃浩銘指名道姓鬧莫乃光。黃浩銘fb截圖30幾個立法會議員日前考察粵港澳大灣區，最後一項就係由廣州南站坐高鐵落返福田站，而有份參與考察嘅「民主派會議」召集人莫乃光，就唔知係咪俾「中國速度」感動到呢，竟然話反對派並唔反對起高鐵香港段，無理由要將香港隔絕，佢哋只係覺得最大問題係「一地兩檢」法律問題啫。𠵱家喺立法會無任何議席嘅「香港眾志」（「中箭」），噚日就整咗條「短打」，實際就係對莫乃光單單打打，不點名鬧佢遺忘反高鐵經驗，又針對佢出身功能界別，話功能界別並非代表人民嘅議員喎。社民連副主席黃浩銘就畫公仔畫埋出米田共，直呼「莫乃光不代表我」，睇怕莫乃光呢個召集人都有排拆！
批缺代議士風骨
「中箭」條「短打」大玩煽情，話當年反高鐵點好點好，可惜「有民主派議員」話反對派並唔反對起高鐵，只係擔心「一地兩檢」法律問題，「議員遺忘寶貴的運動經驗，背棄一貫立場，我們無法苟同，必需表明堅拒被代表。」
佢哋聲稱除咗「『一地兩檢』破壞法制」，高鐵仲「毀人家園」、炒高樓價，亦都令基建超支成為常態，真係乜衰嘢都關高鐵事，但更絕嘅可能係呢句：「功能組別並非代表人民的議員。」
咦？咪即係話緊IT界出身嘅莫乃光？咁都未夠，條「短打」結尾嚟多句「或許有議員以為溫和姿態可以爭取中間選民，卻忘了大眾仰望的是代議士的風骨。」
成篇文擺明單打莫乃光啦，不過喺獄中保釋無幾耐嘅「村長」黃浩銘，就驚班村民唔係咁諗，喺分享篇文時加咗句：「毋忘反高鐵抗爭，莫乃光不代表我！」
「Cyrus Lau」就玩火燒連環船，篤埋莫乃光喺「專業議政」個盟友李國麟出嚟，話佢當年有份支持通過高鐵撥款，所以之後做埋公大護理及健康教育學院院長，更上一層樓咁話。■香港文匯報記者 陳庭佳