寧得罪老婆，莫得罪毛婆！民主黨立法會議員許智峯強搶女EO（行政主任）手機，俾公民黨前立法會議員陳家洛寸佢做咗件蠢事，仲自high（自我感覺良好）唔知錯。相信陳家洛就預咗會惹嚟一班盲撐峯嘅「黃絲」圍攻㗎啦，但未必會估到佢前黨友、「議會陣線」嘅毛孟靜（毛婆）會嚟一招「隔周鞭屍」，隔咗成個星期先至鬧佢機關算盡，仲暗寸佢為補選先至向許智峯開火。
「小惡霸自high 以為鴻鵠將至」
話時話，毛婆前年退出公民黨，就大爆同2010年陳家洛搶主席位有關，不過件事都隔咗成8年，睇嚟毛婆佢都幾好記性，特別係記仇嗰方面囉。
毛婆噚日喺facebook些牙（分享）自居「時事評論員」嘅「林忌」鬧陳家洛個po（帖文，見圖），話陳家洛男人老狗鬧人「小惡霸自high」好冒犯男性，仲批評佢機關算盡，「一心以為鴻鵠將至」。
至於乜嘢係「鴻鵠」呢，毛婆就無講到，不過明眼人都睇得出同補選有關，皆因許智峯如果俾三分之二立法會議員通過譴責議案，就要執包袱走人，到時港島就要補選，而咁啱陳家洛上屆就喺港島當選。
毛婆越鬧越起勁，仲不斷同網民唱雙簧，好似「Danny Wong」寸陳家洛為咗份工連「無人性說話」都講得出口，佢就回覆「同意」。
「Ruby Law」鬧陳家洛食錯藥，佢就話咁樣或者可以證明對方係「多面體」，暗寸佢人前人後唔同樣。
亦都有人叫毛婆出少句聲當幫忙，「咖啡少甜」就話：「翻炒一啲離開主題嘅事其實對撐許智峯幫助不大，我或支持許智峯嘅市民或一群走喺前線嘅『民主派』朋友或許智峯本人，都唔希望喺呢個時刻仲有太多分心走神嘅事或心態去處理事情，我諗你應該明白當中輕重緩急。」
不過，毛婆又點會理佢吖：「為政治計算扮作同道且處心積慮傷人的人，豈可輕易放過。這不是第一次，相信也不會是最後一次。」 ■香港文匯報記者 陳庭佳
