鴿黨立法會議員許智峯前日被捕，鴿黨主席胡志偉又跳出嚟護短，質疑警方唔先預約，認為做法「明顯不符合應有的常規及常識」。呢番驚人說法，竟然獲得網民「認同」喎，「我都話不合常規呀！遲咗12日才拉人......哼！無蒙頭，無落孖葉（手銬）......真係不合常規！」
發表上述言論嘅網民「Linda Look」都幾畀心機㗎，仲貼咗張「現實版」同「常規版」嘅拘捕圖做對比，表達出應該點樣拘捕先啱（見圖）。唔少網民都留言、轉貼附和。「丁丁」揶揄胡志偉︰「你溝通下先la（啦），你黨友係唔係拒絕戴頭套？」
「Eric Lee」質疑︰「乜議員大×晒呀有特權？」「Kei Man Wu」反問︰「警方怎樣做嘢，都要聽你民主黨話？」「Ken Pang」亦問︰「嘩，『泛民』惡過雷公呀，原來搶野（嘢）警察拉人都有錯呼（乎），犯民犯民，是否搞民主一定要打家却（劫）社（舍）是民主派別（必）修課程？」
「Henry Wong」就引述返公民黨黨魁楊岳橋之前嘅「精彩人生論」話︰「『弱（許）智峯』終於找到佢精彩人生啦，唔好剝削佢寶貴嘅機會呀！」■香港文匯報記者 甘瑜