「自決派」立法會議員區諾軒被中大講師劉正批評佢幾次開會都缺席，就走去人哋fb留言，但唔係要解釋或者反駁喎，而係不斷挖人家底，話人博出位，話人神經病等等完全同佢缺席呢個主題無關嘅嘢，到唔夠人講就即時轉移話題。呢段區諾軒同網民嘅精彩對話，大家都應該細心學習呀，因為真係近年政治人物「關公」災難嘅最佳教材。
一開波就離題 寸人「警察世家」
劉正喺fb專頁「無神論者的巴別塔」度寫咗幾篇文鬧區諾軒後，區諾軒就走去人哋fb度留言撩交打。劉正就話要cap低佢嘅留言以防對方delete咗當冇事。咁樣，劉正就太睇少區諾軒啦。
區諾軒留言話：「你都唔好delete警察世家個留言。」劉正反問：「下（吓）？點解要DELETE呢？」區諾軒就話：「你咪自己諗下（吓）點解提差佬囉！」
相信正常人都會睇到一頭霧水，網民「Kristy Hayin Wong」嘅留言就令人豁然開朗：「人地（哋）屋企做警察又點？就等如（於）揭發你瀆職係錯？」「Kinson Yuen」批評：「郁d（啲）話人警察世家乜乜××，係咪家庭成員有人做警察你都好介意先？選擇果（嗰）時出聲講嘛！開街站嘛邊個做差佬或者屋企三代有人當差都唔好×投票比（畀）我丫（吖）嘛。」
理虧轉話題 避談唔開會
好一個區諾軒，唔夠人講就即刻轉移話題講第二樣嘢：「你（劉正）六七年黎（嚟），真係好離譜，用個網名掩蓋真身，隔一排就消費人，但明明自己本身就用真名係港台評論，你無代價，我有代價。」
「CL Man」就反駁：「其實你係咪活喺古代？而（𠵱）家亙（互）聯網時代，亨利（劉正英文名Henry）嘅真身係邊個已經唔係秘密好耐。再者，如果亨利攻擊你嘅事物係無中生有，你咪逐點反駁囉，做乜要東拉西扯講一堆嘢去企圖轉移視線？」
佢批評區諾軒：「你身為議員，市民對你嘅期望比亨利高，你講句嘢嘅代價比亨利大，咁就梗架（㗎）啦，大佬你出緊公帑架（㗎），如果你覺得咁難委（為）你咪辭職囉，任何人都可以為自己作出選擇架（㗎）啦。」
發爛渣辱人豬 被反殺玩失蹤
區諾軒又衰咗，但又唔忿氣呀，再轉換話題玩人身攻擊：「豬亨（劉正體型肥胖）你番（返）屋企食蕉啦，做港台節目做得你咁差，你又有乜好？......你會唔會覺得自己變態同精神有問題？追住個人亂咬六七年。」
「LongLong Chan」即時反駁：「退一萬步黎（嚟）講，就算亨利做乜都差，同你無開會無投票有咩關係？」「Kenny Leung」也道：「變態同精神有問題，和你沒投票走到日本旅行，是沒有衝突呀。即使地球上再多了一名癡（黐）線佬，你依然是沒有投票，這個事實，除非地球爆炸，大概也不能磨滅。」
又唔夠人講，區諾軒又轉移話題嘞，仲要考埋古：「你以前濫用中大動漫研究會Ｄ（啲）資源終於無用拿？講下（吓）自己以前個網址出黎（嚟）聽下（吓）？」
「Tkk Heung」即時狠批：「而（𠵱）家講緊立法會議員開會啊，做乜攞大學上庄（莊）嘅野（嘢）黎（嚟）講？咁係咪要講返你幼稚園屙完尿冇洗手呀？」「WS Wong」就一句KO佢：「多次留言都無正面回應，衰過潑婦罵街。不如回應一句，無去開會投票果（嗰）日係咪去咗日本旅行，yes or no就夠。」■香港文匯報記者 陳川