■唔少眼利網民都覺得個藍色衫嘅四眼仔好似梁天琦。 生力清啤fb圖片今時今日網絡世界大行其道，要做好網上宣傳就人人都知，不過有時啲「小編（facebook專頁管理員）」權力過大，用咗公司專頁去宣傳個人政治理念就容易瀨嘢嘞。話說生力清啤早幾日喺fb度po（貼）咗張圖，話就話祝大家父親節快樂，但唔少眼利網民都覺得個藍色衫嘅四眼仔好似因旺暴案被判入獄6年嘅「獨琦（梁天琦）」，仲有「港獨」分子分享生力張圖去講梁天琦𠻹。
好多人都知「本土民主前線」以藍色為象徵，咁啱得咁橋張圖入面個四眼仔就着住藍色衫、戴眼鏡，加埋個髮型同頭髮分界，好容易令人一下諗起「獨琦」。有唔少網民都分享個post問「點解畫到咁似梁天琦......」、「係咪梁天琦嚟」，有擺明係「獨琦」支持者嘅網民直情分享張圖話︰「如果你知道圖中戴眼鏡的男生其真身為何，請即提毫（筆）寫信予他。全因『保家衛國』，換來一場『迫害』，他今年過不了父親節。」
就係咁，生力個宣傳圖就變成「獨派」分子嘅宣傳圖啦。唔知生力發現自己咁樣俾「獨派」過橋會有咩反應呢？■香港文匯報記者 鄭治祖