呢幾日人人追睇世界盃，愛隊落敗自然令人心悒，但都唔可以亂咁發洩老屈㗎。話說噚晚德國隊以0比1輸畀墨西哥，唔少人都跌破眼鏡，《蘋果日報》二話不說就稱搵到「幕後黑手」，話係因為民建聯撐德國隊，所以「燈死」咗佢哋喎。如果咁都有得燈，真係要望清楚邊個燈死邊個嘞。睇返《蘋果》個賽前預測，報紙大字標題寫到《人強馬壯夠贏墨西哥 衞冕德國勢響頭炮》，印咗落報紙冇得改㗎，論燈力，民建聯又邊度夠《蘋果》勁呢？
克勤珮帆撐德遭屈機
話說民建聯早前喺facebook發文，話該黨議員陳克勤同葛珮帆撐德國隊，結果就俾《蘋果》入咗佢哋數，話係佢哋燈死德國嘞。《蘋果》仲喺fb出文話民建聯︰「德國中，阿根廷又中，雙牙嗰日冇指名撐邊隊所以打和，準。」（左圖）
其實民建聯又冇話邊隊贏，咁都話佢燈又真係牽強咗啲喎，不如睇吓《蘋果》自己又點預測。咁啱得咁橋，佢哋對西班牙同葡萄牙嘅「雙牙」對戰，就大字標題話《西班牙穩嗒「葡萄」》，但最後兩隊和咗；阿根廷同冰島打和嗰場，《蘋果》就預測《阿根廷小勝破「冰」》；咁德國隊輸畀墨西哥呢？上面開咗估，唔使再講啦。如果公民黨四眼陳（陳淑莊）睇到《蘋果》咁好「成績」，都可以話係民建聯燈，相信佢都會講句︰「你真係謙虛嘞哥哥。」
咁網民點睇呢？似乎係《蘋果》讀者嘅「Stephen Lee」話︰「其實貴報都幾準架（㗎），阿根廷，德國同巴西都俾你地（哋）燈死。」「Dusty Wong」好實在咁話︰「香港人大把撐德國啦，大埔lulu都話德國贏硬啦，咁係咪要『泛民』搞個活動集體切腹呀？......《蘋果》唔好×咁無聊啦呢d（啲）都報。」「Chan Bing San」揶揄︰「『泛民』一早估到德國輸波，『泛民』好野（嘢）。」
不過，民建聯自己就唔係太介意俾人老屈，仲好大量咁喺fb出po話︰「 燈神忠告︰燈神唔怕做，最緊要唔賭。」然後就話該黨議員周浩鼎、劉國勳同張國鈞都撐英格蘭，何俊賢就撐比利時（右圖）。其實大家都係講吓自己心水球隊啫，《蘋果》就算要屈人燈，都睇吓自己報紙寫咗咩先吖。■香港文匯報記者 甘瑜