當大家睇到阿根廷嘅美斯上場作戰，除咗諗起佢射失12碼仲有乜嘢？有人就諗起鴿黨（民主黨）個釘書健（林子健）。點解，因為林子健當日話相信自己「被擄走」，係同佢想寄美斯簽名相畀劉霞有關囉。唔單止世人遺忘咗釘書健，連鴿黨都遺忘咗佢。黃大仙區議員譚香文近日就喺facebook踢爆鴿黨班人冇承擔，話佢哋「始亂終棄」釘書健，當日係威係勢推釘書健出嚟開記招，出事後就極速切割，連法庭審訊釘書健報假案，庭內都係一隻鴿都冇。釘書健自己亦喺fb度慨嘆︰「原來多年的友情只價值$300元正。」300蚊？真係霞姨keep住派飯盒都唔止呢個價啦！
AV仁曾陪開記招 出事即切割
見到美斯就諗起釘書健，真係唔知幸或不幸，但總算係釘書健存在過嘅證明。fb專頁「時聞香港」近日就貼咗釘書健當日聲稱自己被擄開記招嘅相出嚟，相中嘅佢攞住張美斯簽名照，成為佢口中被「針對」嘅「證據」之一。同一幅圖仲有鴿黨大佬AV仁（何俊仁）同釘書健拎住美斯波衫嘅合照（見圖），呢張相𠵱家相信應該比美斯相更加罕有嘞，因為AV仁仲點會再黐埋釘書健度吖。
譚香文近日都就釘書健被「始亂終棄」喺fb寫咗篇文，話鴿黨成日俾人鬧，除咗係因為佢哋政治上唔得，亦都係因為佢哋冇承擔，「好似林子健呢單嘢就見到民主黨班人幾咁無承擔。」
佢憶述，當日釘書健其實冇諗住開記招，連釘書健阿媽都勸佢唔好多事，但鴿黨「某位大佬」就執意要開記招，仲氹人阿媽落疊，「林子健最後係（喺）民主黨一眾大帝簇擁之下召開記者會，一個政黨幫人召開記招，照計點都理解過件事係唔係真的才敢押注，斷無未經查證即開記招之理。結果，風向一轉原告變被告，當日推佢上記招的民主黨的一眾大帝，大難臨頭各自飛，極速切割。」
然後大家都見到，釘書健就因為涉嫌報假案要接受審訊啦。譚香文爆料，話鴿黨本身都有個前議員提議幫手籌律師費，「竟被某議員指要留番（返）D（啲）錢落選舉工程度。」冇錢捐都算，近日審訊亦冇鴿黨中人撐場，「連當日慫恿林子健開記招的民主阿伯都失蹤，結果就只有我同路小教會的張牧師到場聽審。民主黨人？我就見唔到喇！」
峯搶又係咁 大難臨頭各自飛
譚香文仲話，唔止釘書健，之前強搶女EO手機嘅民主黨立法會議員許智峯，都係咁樣俾鴿黨切割喇，「民主黨呢種大難臨頭各自飛的政黨，下面班細唔係念在有資源，真係入嚟都罷！」
當事人釘書健就更加心酸，前日喺fb出文，例牌話自己「被陷害」，之後就呻鴿黨嘅涼薄︰「最痛心還是那些平時稱兄道弟的人，在政治現實下掩蓋了你們的信任、良知和承諾。原來多年的友情只價值$300元正。」
其實鴿黨關唔關心釘書健同許智峯，都唔係市民關心嘅重點。大家都只係想知，到底鴿黨會唔會有膊頭啲，同公眾交代返件事啫。不過似乎就真係難啲囉。 ■香港文匯報記者 甘瑜