梁振輝 香港資深出版人
白頭佬：好多球評家成日話非洲隊係「黑馬1」，上幾屆有「喀麥隆」同「科特廸瓦」，今屆就有「尼日利亞」同「塞內加爾」，大家點睇呢？
攣毛：大不如前，冇乜料到！
邦仔：「科特廸瓦」，你講緊邊個國家呀？
跑步佬：咪以前叫「象牙海岸」嗰個國家囉！
細肥：橫睇掂睇，硬係睇唔出「Ivory Coast」乜得可以譯做「科特廸瓦」喎？
中肥：咦，「塞內加爾」個「塞」咪係「巴塞」個「塞」，咁又會唔會......
阿賴：係咪想話會唔會讀做「suck內加爾」呀？
中肥：就係囉！
大肥：咁「埃塞俄比亞」係咪讀做「哀suck俄比亞」；阿賴成日畀埋晒啲輸死人嘅「山埃貼士」，咁係咪又要讀做「生哀貼士」呀？哈哈哈......
Angus：跑步佬，你係文化人，你話呢？
跑步佬：咁睇得起我！我只係可以講，唔好見嚫「埃」同「塞」呢兩個字就咁大反應囉！
上海佬：有嘢問，「宏都拉斯」嗰隊今屆有冇份？
邦仔：上海佬，你講乜「宏都拉斯」呀？係想問「洪都拉斯」呀嗎？今屆就冇佢份！
Ken仔：講個秘密你哋聽，未開鑼前，我見「秘魯」攞冠軍係1賠200，咪係咁意買咗50蚊囉！
攣毛：Ken仔，發夢冇咁早！
大肥：呢啲叫「刀仔鋸大樹2」，如果中咗就「和過和味龍3」囉！
細肥：我就話呢個世界冇咁多如果囉！
白頭佬：嗱，呢場波，兩隊實力差唔多，就真係「和味濃4」嘞！
細肥：咦，「秘魯」個普通話係咪「mì lǔ」呀？
跑步佬：「秘密」讀「mì mì」，細肥，我話你讀得啱！上海佬，你係普通話人，你話呢？
上海佬：你班友，成日笑我講廣東話點差點差。嗱，即刻上網查查，就知你哋啲煲冬瓜（普通話）有幾煲冬（普通）嘞，哈哈哈......
跑步佬：想問下大家，知唔知五六十年前嗰隊「皇馬」譯做乜？
白頭佬：冇番咁上下年紀，都唔會知係「真馬德里」囉！
Ken仔：咁係咪有隊叫「假馬德里」吖？哈哈哈......
Angus：開波嚹，有咩「留返拜山至講5」！
「Ivory Coast」是西非一個國家，「象牙海岸」是其意譯。聯合國自 1986 年起以其法語「Cote d'Ivoire」的音譯「科特廸瓦」作為該國的官方中譯，這就是為何驟眼看去看不出這個中譯與「象牙海岸」有何關連了。查台灣現仍沿用「象牙海岸」這個譯名。
西非國家「塞內加爾」是前法國殖民地。觀其英文名稱「Senegal」和法文名稱「Sénégal」，大家不難看出「塞內加爾」中的「塞」的讀音應接近「sak1」而非「菜」。
大抵是因為多人認為「哀及」是「埃及」的正讀，所以有些人會把一些涉及「埃」字的專有名詞中的「埃」讀作「哀」，如「埃塞俄比亞」讀做「哀塞俄比亞」，「山埃貼士」讀做「生哀貼士」。「埃塞俄比亞」（Ethiopia） 這個中譯應是參考了「埃及」（Egypt）的中譯方式，所以當中的「埃」也讀作「挨」。「山埃」，學名「氰化鈉」（sodium cyanide），是一種劇毒化合物。「山埃」這個俗稱是由「cyanide」翻譯過來的，所以「埃」的讀音應接近「挨」而非「哀」。
上期提到香港回歸後，不少地理名稱的中譯多取用內地所沿用的，可這並非可「照單全收」的，中美洲國家「Honduras」的中譯便是一個上佳例子。台灣和內地都把它譯作「宏都拉斯」，香港則譯作「洪都拉斯」。在台灣和內地，「宏/洪」的讀音均為「hóng」，與「Honduras」中的「hon」的發音相近。然而，「宏（wang4）」與「洪（hung4）」卻有着截然不同的粵音，無怪香港一直都以「洪都拉斯」作為中譯了。
「Peru」是南美一個國家，香港和內地以「秘魯」作為中譯，台灣則用「祕魯」（「秘」同「祕」）。可能受「秘密（mì mì）」一詞的影響，人們包括大部分說普通話的人都把「秘魯」讀成「mì lǔ」。明顯地，此讀法並不符合原讀。1985年，普通話審音委員會規定「秘魯」中的「秘」讀「bì」，圓滿地把那與原讀不符的情況解決了。
「Real」在英語中確有「真」的意思，可在西班牙語中，此字相對於英語中的「Royal」，有「皇家」的意思。看來，上世紀六十年代初，體育界和新聞界把「Real Madrid」譯成「真馬德里」是不太恰當的。應是這個原因，後來媒體就改譯做「皇家馬德里」，簡稱「皇馬」。
______________________
1.「黑馬」（dark horse）原指在賽馬場上本來不被看好卻意外地到最後獲勝的馬匹，後用以比喻那些實力難測的競爭者或出人意料的優勝者。
2.「刀仔鋸大樹」比喻付出少卻獲利豐，也比喻以小博大。多數人認為因付出不多所以即便有損失亦不會介懷。
3.「和味」指好味；「和味龍」，學名「龍虱/龍蝨」，俗稱「水曱甴」。之所以叫「和味龍」是因為烹調後美味可口。「和過和味龍」指比和味龍還要和味，比喻達到一個超出預期且非常理想的結果。
4.「和味濃」是從「和味龍」演變過來的。指某賽事雙方實力相當，打和味道濃烈。
5.「留返拜山至講」指有話不用此時說，意味着聽者嫌某些人話太多或對其所說的內容不感興趣；要說就留待拜山時向先人訴說好了。
【專欄簡體版】https://leoleung2016.wordpress.com/