■「黃絲」改圖寸老馮賴死都唔畀班後生上位。 fb圖片民協噚日向傳媒發出採訪通知，話今日會聯同仲係佢哋中委嘅老馮（馮檢基）開記者會，交代老馮嘅去向。不過，民協主席施德來似乎唔想俾老馮搶晒fo（焦點），搶先一步同友好傳媒爆料，話對方會退黨，專注做佢新插旗嗰檔「壓力團體」喎。至於老馮選唔選11月個立法會九龍西補選呢，應該今日都未知住，但班「黃絲」一於鬧定先，叫佢唔好同小麗老千（劉小麗）或者李卓人爭食，但係亦都有花生友叫佢去選，仲話會投票畀佢激死主流反對派𠻹！■香港文匯報記者 陳庭佳
自從喺上次立法會補選畀主流反對派迫到無得做「Plan B」之後，老馮就一直單單打打，除咗不滿主流反對派同小麗老千欽點李卓人做今次補選「Plan B」，佢本新書亦都有傳會對主流反對派作出大控訴，更加有指佢會喺今次補選落場，同小麗老千或者李卓人撼過咁話。
民協搶風頭 做「基蟲」爆料
民協噚日喺採通嗰度話，老馮最近寫書回顧從政同社運經歷，刺激到佢思考自己未來喺社運、政治同民協嘅角色同位置，加上佢有意集中精力發展「民間壓力團體」，所以今日會同佢一齊開記者會交代佢去向。
雖然篇採通都已經寫得幾明，但唔知係咪信唔過「黃絲」啲理解能力，施德來揀咗佢哋最鍾意睇嘅《蘋果日報》，搶先一步講老馮會退黨，一於畫公仔畫埋腸入面啲嘢。
施德來話，老馮退黨唔係同民協「有咩唔啱」，今次只係老馮一個退黨，無撬人走，佢之後會專注發展佢檔「壓力團體」，主打扶貧、房屋、醫療問題，檔嘢亦都會同民協建立「合作夥伴關係」。
施德來仲好似老馮肚入面條蟲咁，話老馮覺得如果繼續孭民協個牌頭，民協嘅選舉工作會令到佢難以兼顧「壓力團體」喎。
黃絲講扶青 自己想世襲
人都走啦，班仇老「黃絲」都仲係要將老馮片到體無完膚。「Tony Choi」寸佢回晒塘，仲當正佢會選今次補選咁，叫佢應該「反思己過」，「你成日話要為巿民做實事，咪係時侯（候）退落嚟，專心扶育年青（輕）一代，為地區為市民重新植苗囉。馮檢基！大時代活輪係唔等人，過咗氣就不要強求。咁多年啦！要清醒喇。」
「Paul To」就話佢存在嘅目的只有一個，「就是鎅（𠝹）票」，「Well Lee」就覺得佢想借呢單嘢谷新書銷情。
不過，「益友」唔係咁睇喎。「無敵神駒」仇思達唔單止支持老馮退黨，仲支持佢喺補選去馬，講到尾都係想隊主流反對派：「請『泛民』不要再使用嗱喳手段，強行剝奪其被選舉權。一邊說反對DQ，一邊脅迫潛在對手棄選、變相DQ，食相惡劣。」
「益友」挺老馮參選隊死飯民
「Mary Kwan」質疑點解民主黨個涂謹申可以做到差唔多30年議員，而老馮就唔可以，「『飯民』把私家專用『伸縮尺』今次又點樣去定呢？」
神駒就話嘞，如果好似司徒華咁遲先退休，涂謹申仲可以選多4屆，贏晒嘅話總共可以做足12屆議員，即係40幾年。
「Kwokchun Cheng」就不滿主流反對派打壓老馮，但又推差唔多年紀嘅李卓人做「Plan B」。
利申係九西選民嘅「Chow Man Bo Chow」更加話，如果老馮真係選就會投畀佢，「玩×小麗老母，又可激×死『飯民』，一舉兩得。」