■陳友把溫拿的奮鬥史搬上銀幕。在七十年代紅透半邊天的溫拿樂隊，是香港樂迷心目中的傳奇。早前，成員之一的陳友便親自執導電影《兄弟班》，把溫拿奮鬥發跡的故事搬上大銀幕，與樂迷分享那段屬於溫拿的青葱歲月。■文：朱慧恩 攝：潘達文
電影《兄弟班》由陳友自編自導及監製，並找來陳家樂、王梓軒、林耀聲、鄧加樂、于湉、吳鶴謙六人分別飾演年輕時的溫拿成員。回望四十年，由Loosers變Wynners，溫拿在鎂光燈下贏盡掌聲。友誼橫跨四十載，導演陳友把五人在多年來所經歷的事情在腦海裡逐格播放，幾經辛苦，最終選擇了以「團結」為核心的一段故事獻給觀眾。
文：香港文匯報 陳：陳友 樂：陳家樂 軒：王梓軒 聲：林耀聲 謙：吳鶴謙
文：為何會想拍《兄弟班》？
陳：我這輩子都好Dramatic（好戲劇性），人生起起跌跌。當一個人去到咁上下年紀，便自然想回顧下過往的日子。而我哋呢班兄弟相識多時，本身都已是一個好特別的故事。其次是現時入戲院的多數是年輕人，我希望把我們過往的年輕歲月，給現在的年輕人參考，希望提高他們入場的價值。
文：選擇這時開戲，有無特別意義？
陳：𠵱家都好「抿水」啦，現在不拍之後拍不到啦！（笑）其實我用了兩年多時間籌備，劇本就不用創作，因為已經有好多真實材料。但材料實在太多，在這四十年有太多人與事，是一件好貪心的事。最後決定用阿強（葉智強）、阿友、阿健（彭健新）的角度去睇這個世界，以（溫拿的）團結作為故事的核心。
文：在《兄》中，溫拿既有團結一面，但亦因成員受歡迎程度不同而有矛盾，現實中的你們有無心病？
陳：唔係心病，由頭到尾都無。只是當社會發展，去到一個階段，分開是最好的。而我就是當事人，覺得高處就應該停，不要阻住兄弟繼續發展。記得當時完了第一次演唱會，阿B（鍾鎮濤）喊得好辛苦，佢獨自一人在台灣拍戲，好孤單，所以佢好Enjoy成班一齊開演唱會。（溫拿幾時再開Concert？）無原則㗎，有得玩就玩﹗
文：談談四位演員合作的緣由？
陳：《兄弟班》是香港片，而我哋都係香港仔，當然搵香港仔做啦。（為何阿B同阿倫（譚詠麟）唔搵香港演員？無人敢演？）（大笑）鄧加樂都是香港人，不過在加拿大出世，至於于湉是監製找的。再者重心始終放在無咁靚仔的三個「弱者」身上。
飾演阿倫的鄧加樂，當我第一眼看見他時，就覺得他很有阿倫年輕時的氣息與感覺，所以很想搵佢。至於陳家樂的角色，則有很強的悲哀感，當我睇《幸運是我》時，就覺得係佢啦！阿謙就飾演鼓手阿友，我又唔需要佢特別似我，最緊要識打鼓。聲仔同阿強就好似，都係唔講嘢，但就唔聲唔聲嚇你一驚。梓軒就係大佬款啦，而且他在音樂方面就好厲害。
演員各遇挑戰
文：四位演員演繹有何難度？
樂（飾阿健）：我彈結他不是太好，最初挺擔心。和導演見面時問我識唔識彈，我當然話識。後來知道「大鑊」，啲歌好難彈，然後即刻去上堂。至於角色方面，我有想過究竟是帶點喜劇色彩去演，還是很真實地做。而導演叫我不用想太多，用最真實的情感演即可。
謙（飾阿友）：（你較少幕前演出，又要演導演本人，壓力大？）有好有不好。好處係導演話點演我就點演。最難就是要「度」一段與劇情有關的Drum Solo，我要執得比錄音那位鼓手更精準。同時，在拍《兄》時我正好離開了所屬的樂隊小紅帽，情緒有點波動，所以要控制情緒，投入角色。（樂and軒：佢好鍾意搶戲，好似來自另一個星球。）
聲（飾阿強）：我想最困難一定是彈Base，結他我只識三個Chord，基本上由零開始，所以音樂對我來說是最難。在角色方面，我的角色似是局外人，但亦是當局者和旁觀者，也是一個「說書人」的角色。導演同我講，你表面好似傻吓傻吓，但內心是奸仔。所以要演一個表面傻仔但內心奸仔的角色，也算有難度。
軒（飾阿叻）︰我在戲中飾演一個大佬，不過係一個唔叻的大佬，好多嘢撞晒板，但又要有義氣又硬頸。我少演呢類角色，整個身體和動態都唔同，和我平時演的角色好唔同。
場地提供：1563 At The East Live House and Restaurant
王梓軒服裝提供：Neil Barrett
林耀聲服裝提供：ithk