一隻熱狗如何挑起一場鬧劇？有埋一班「熱狗」（「熱血公民」）同埋成日追擊佢哋嘅「無敵神駒」仇思達就得。繼舊年神駒喺《熱血時報》個攤位附近食熱狗引起對罵，今年《熱時》個位繼續喺有熱狗賣嘅小食檔附近，真係應景。神駒就食過返尋味，今年再咬住熱狗喺《熱時》攤位附近揖揖揚揚，引嚟「熱狗」前「首領」狗達（黃洋達）拖埋一班「熱狗」出手出口去「招呼」佢，「熱狗」副主席四眼（鄭錦滿）亦都唔執輸去攞尾彩，過程好似黑社會收陀地咁，嚇到神駒要報警。不過，有花生友就覺得神駒擺明玩嘢，所以搞成咁都係自己攞嚟，亦都有人覺得「熱狗」同神駒都各懷鬼胎，兩邊都唔抵幫！
話說上年《熱時》個攤位都喺小食檔附近，神駒有晚走去買咗條熱狗，之後同一眾「益友」行到《熱時》攤位附近直播食熱狗，激到「皇后」殘獸胃（陳秀慧）衝出嚟，起勢咁鬧佢抹黑《熱時》會有報應。事後有路邊社消息傳出，話殘獸胃匿埋喺廁所爆喊，怨佢老公狗達點解唔幫佢，仲係咪男人咁話。
書展攤位前直播食熱狗
神駒今年又嚟呢一招，前晚喺facebook做「書展美食導賞」直播，狗達就即刻振夫綱，拖住一班「熱狗」埋去「招呼」神駒，先一句大喝「喂！食熱狗呀」，再嚟個捉住神駒隻手，嚇到神駒跌咗條熱狗腸落地，仲一隻手拍埋牆度，擺明唔想神駒咁易甩身，其間不同造型嘅「熱狗」就接力同神駒同「益友」「交流」，包括外形瘦削、頭髮微鬈仲有些少鬚根嘅《熱時》主持馬啟聰。
神駒話狗達做乜「刑事毀壞」佢條熱狗，狗達就同佢講聲「唔好意思」，仲好激昂咁同挨緊喺牆嘅神駒講：「熱狗係好嘢嚟㗎嘛！難得有個熱狗愛好者，咁鍾意食熱狗，我又係好欣賞你，好想買多條畀你！」神駒嚇到手震震，狗達叫佢唔使驚，之後仲入去小食檔買返條熱狗畀佢。
狗達買熱狗期間，其他「熱狗」繼續圍神駒，又摟隻揪又盛。最後，神駒都係無要到狗達嘅「一番好意」，叫狗達「拎返去畀你個陳秀慧食啦！」
狗達走咗之後，四眼埋嚟攞尾彩，佢拎返神駒上年書展唱「辱華歌」單嘢，話神駒搞「港獨」，又寸啲「益友」無出到手護主，「你個人無義氣，識埋啲朋友都無義氣，咪唔敢出嚟幫你囉！」
打唔成交上fb打鍵戰
神駒事後返到facebook打鍵戰，話要嚴厲譴責狗達班人圍佢推佢、「刑事毀壞」佢啲嘢食，仲話已經報咗警，叫啲「益友」cap圖（截圖）再同書展主辦商貿發局投訴，之後會有「第二波行動」喎。
當時一直幫神駒揸機做直播、其間粒聲都無出嘅「JoJo Wu」，定咗驚之後亦都喺facebook反咬四眼，話佢明明前年喺選舉論壇表態支持「港獨」，??家就話佢哋只係撐「永續基本法」，之後仲回帶返有關報道出嚟。
四眼亦都出po（帖文）寸啲「益友」無鬼用：「連踩場都唔敢扮咩搞事呀，『網上食熱狗』呢個名真係改得冇錯，成班淨係識得匿埋，行出嚟嗰堆又冇義氣。」狗達回返「熱狗」留言嘅時候，亦都寸寸貢咁話自己有啲唔好意思，因為「欺負弱小」喎。
發惡片被放「將軍澳」fb
四眼??家喺將軍澳寶林邨做緊地區工作，擺明出年想喺呢區選區議會。有網民將條片擺上去facebook專頁「將軍澳」度，雖然有人覺得神駒「先撩者賤」，但大部分人都覺得四眼同班「熱狗」成班黑社會咁，專頁管理員「Ringo Ng」更加出po叫四眼回應：「你唔高興唔代表你哋有權圍佢（神駒）郁佢，惡到咁仲駛（使）乜選區議員？面對谷友，出嚟講兩句好嗎？」
四眼就反擊話「Ringo Ng」亦都質疑過神駒收錢，近期對主流反對派係又鬧唔係又鬧喎，呢啲咪叫誠意為市民服務囉。■香港文匯報記者 陳庭佳